Bere hurrengo urratsen berri eman du GuraSOSek, Gipuzkoako erraustegiaren lanak hasiko diren egunaren bezperan. Orain arte jorratutako ildo juridikoarekin jarraitzeaz gain, iragarri dute proiektuaren finantziazioari trabak ipintzen eta hondakinen kudeaketarako gizarte akordio zabal bat sustatzen saiatuko direla.
GuraSOSek kideek prentsaurrekoan adierazi dutenez, Meridiam inbertsio-konpainiak du erraustegia egingo duen enpresa-taldean parte hartzerik handiena. Haiek ipiniko dute erraustegia eraikitzen hasteko 50 milioi euro, Eskandinaviako pentsio-funtsetatik datozenak. GuraSOSek iragarri du Norvegiara joko duela, hango gurasoei azaltzeko zertan erabiliko den euren dirua, eta erraustegia finantza ez dezaten eskatzeko.
Honezkero Meridiam taldearekin harremanean jarri direla azaldu dute GuraSOSeko bozeramaileek, “enpresaren gutun etikoak ustelkeriarekin lotuta egon daitezkeen trantsakzioak eta gizartearen oinarrizko eskubideak errespetatzen ez dituztenak” baztertzen dituela gogorarazteko. Hala, erraustegia egingo duen enpresetako bat, Urbaser, Lezo operazioaren barruan ikertzen ari direla ohartarazi diote Meridiami.
Era berean, inbertsio-funtsari azpimarratu diote erraustegia egiteko prozeduran ez direla behar bezala aintzat hartu ingurumenaren babesa eta eskubide zibilekiko errespetua.
Hondakinak kudeatzeko proposamen berria
Hrrez gain, GuraSOSek iragarri du hondakinen kudeaketarako akordio zabala bultzatzen saiatuko dela. Hitza-hartu izeneko prozesu parte hartzailea abiaraziko dute Gipuzkoa osoan, “gaian adituak direnen eta EHUko Parte Hartuz ikerketa taldearen laguntzarekin”. Azken emaitza 2017-2030 epealdian hondakinen kudeaketarako proposamen bat izango da, Foru Aldundiari helaraziko diotena.
Ildo horretan, herrialdeko agintarien jokabidea kritikatu dute, Jose Ignacio Asensio Ingurumen diputatuak iragarritako prozesu parte hartzailea garatzen ari ez dela salatuz. Imanol Lasa Aldundiko bozeramailearen hitzak ere gaitzetsi dituzte. Erraustegiaren lanak hastearekin batera “zalaparta amaituko zela” esan zuen Lasak. “Herritarren eskubideon aldarrikapen demokratikoa ‘zalaparta’ dela iruditzen bazaie, euren jarrera demokratikoa aztertu beharko lukete”, erantzun du Joxe Mari Izeta GuraSOSeko kideak.
Azkenik, “ikuspegi pragmatikoago eta ekonomikoagoko” ekimen bat iragarri dute; Gipuzkoa + Technology. Gipuzkoa hondakinen kudeaketaren alorrean erreferentzia teknologiko eta sozial bihurtzea da horren asmoa. “Herrialdeak baldintza objektiboak ditu nazioarteko eredu izateko hondakin kudeaketan. Prebentzioan, berrerabiltzean eta birziklatzean inbertsioa egiteko proposatzen dugu. Ekimen horien inpaktu ekonomikoa oso handia izan daiteke, eta eragina izan dezake kohesio sozialean ere”.
Eusko Jaurlaritzako Ingurumen sailak ez zuen Artaxoara eramandako hondakinen karakterizazioari buruzko informaziorik; hala dio Eusko Legebiltzarrera igorritako dokumentazioan. Gipuzkoako erraustegia kudeatzen duen Ekondakinek lixibiatuak bidaltzen jarraitu zuen, Ecofert enpresak... [+]
Bilboko Auzo Elkarteen Federazioak komunikatu bat eskaini du Gipuzkoako erraustegiko lixibiatuak Zorrotzara bidaltzeko asmoaren inguruan.
GuraSOS plataformak Zubietako erraustegiarekiko duten jarrera ukatzailea aurpegiratu zieten foru agintariei asteazkenean Gipuzkoako Batzar Nagusietan egindako agerraldian. GuraSOSen bozeramaile eta abokatu Joseba Belaustegik azaldu zuenez, egungo arazoen aurrean beste alde... [+]
Ingurumenaren aurkako ustezko delitu bat egin ote duen eta dokumentuak faltsutu dituen ala ez ikertzeko eskatu du Gipuzkoako Fiskaltzak, GuraSOS elkarteak jakinarazi duenez.
Donostiako suhiltzaileek jakinarazi dutenez, erraustegiko biolehortze-plantan gertatu da ezbeharra.