20 urte bete berri ditu, otsailaren 10ean, oraindik ere argazkilari eta diseinatzaileen programa kutunenetakoa denak. Argazkilaritza asko aldatu da ordutik, eta irudien manipulazioa eguneroko ogia da egun. Erreminta polemikoa bihurtu da Photoshop.
Adobe Photoshop-en 1.0.7 lehen bertsioak bilakaera handia izan du, gaur egungo CS4 bertsiora iritsi arte. Hiru dimentsiotako irudiak editatzeko aukera ematen du azken honek, eta softwareen arteko lehia gogorra bada ere, imajinak tratatzeko tresna gustukoenetakoa edo gustukoena da, zalantza barik. Interneten produktu pirateatuenetakoa da, eta hala ere hiru milioi lizentzietara iritsi zen 2000. urtean.
Interesgarriena, ordea, eskaintzen dituen aukeren gaineko eztabaida etikoa da. Askotan hitz egin da aldizkarietako azalak eta publizitate orriak betetzen dituzten modeloak gehiegi ukitzeak sortzen dituen edertasun eredu ezinezkoez. Non dago muga? Argazki digitalak manipulatzeko Photoshop erabiltzea galarazi nahi du Britainia Handiko parlamentuak eta horri buruz idatzi nuen blog honetan: Photoshop erabiltzea debekatu nahi dute Ingalaterran.
Beste ildo polemiko bat egunkariek eskaini dezaketen informazio faltsuarena da, irudia pixka bat ukitzearekin bakarrik. Prentsa-argazkilaritzako lehiaketetan (eta agian gerora baita argazki artistikoenetan ere) irudi orijinala eskatzen hasi dira dagoeneko, irabazle suertatu daitekeen argazkia benetan horrelakoa den ala Photoshop-en emaitza den jakiteko. Iaz argazkietako batek ez zuen lehiaketa famatu bateko galbahea pasa; hona albistea: Gehiegi desitxuratutako errealitatea?