Uztailaren 12an Espainiako Ministro Kontseiluak 9/2013 errege-dekretua kaleratu zuen, sektore elektrikoaren bideragarritasuna “bermatzeko”. Ekologistak kexu azaldu ziren orduan, informazio eza zela eta.

Datozen asteotan, PPk sektorea erreformatzeko behin betiko legea onartuko du, eta herritarren kontrako “erasoa” dela salatu dute.

Zer aldatuko du sektore energetikoaren erreformak?

Hiru gai nabarmendu dituzte kritikoek: argiaren faktura, autokontsumoa eta energia berriztagarriak.

Egun bi parte dauzka argiaren fakturak. Batetik, tasa finkoa, kontsumoaren arabera aldatzen ez dena; bestetik, tasa aldagarria, erabilitako energiaren kopuruari begira aldatzen dena. Gobernuak aurrera eramango duen legearekin tasa finkoak %63 egingo du gora. Kontra daudenek salatu dutenez, neurriak biztanleria gogogabetu nahi du ez aurrezteko, eta energia “xahutzeko”.

Autokontsumoa da kexa iturrietako bigarrena. Diotenez, telemetria eta zenbatzaile makina garestiak exijituko dizkiete kontsumo propiorako energia sortzen duten guneei. Era berean, ekoiztu eta saretik pasa gabe erabiliko den energiagatik “laguntza bidesaria” ordaindu beharko dute, alegia, dirua eman beharko diote Gobernuari . Gainera, autokontsumo txoko guztiek izena eman beharko dute legezko izateko. Bi hilabeteko epean egiten ez badute, 60 milioi euroko isuna ezarri diezaiekete. Industria Ministerioak baimena edukiko du eraikinetara sartzeko, legeztatu gabeko ekoizpen guneak dauden ikusteko, baimen judizialaren beharrik gabe.

Hirugarrenik, energia berriztagarrien egoera aztertu dute. Diotenez, energia politiken “biktimak” dira. Murrizketa “asko eta bidegadeak” izan dituztela diote.

Alternatiba: “desolbediencia”

“Desolbediencia”. Hori da ingurumenaren aldeko makina bat taldek legeari aurre egiteko proposatu dutena. Desobedientzia eta gaztelaniazko ‘sol’ hitzaren arteko hitz jolasa da hitza. Hau da, neurriari intsumisioa egin eta kaudimenezko jarrera hartzera bideratu nahi dituzte herritarrak.

Hainbat gai landuko dituzte kanpainaren baitan. Besteak beste, gaiari buruzko hitzaldiak herriz herri emateko prest agertu dira eta jendarteari gutxiago kontsumitzeko eta energia kooperatiba “berdeei” erosteko eskaera egin diote.