Ordenagailuak urrutitik kontrolatzea errazten zuen akatsa aurkitu dute IBMko ikertzaileek. Windows 95etik hasita, Microsoften sistema eragilearen hurrengo bertsio guztiek izan dute ahulgune hori.
Maiatzean aurkitu zioten “bug” edo akats hori Windowsi. Irtenbidea bilatzen hilabeteak pasa ondoren, Microsoftek “adabaki” bat sortu du bere sisteman 19 urtean egon den zulo hori estaltzeko.
Akatsaren arriskua 9,3koa da 10eko eskalan, BBCren webguneak aipatzen dituen adituen arabera. Beraz, besteren ordenagailuan baimenik gabe sartu nahi zutenek gaur arte errazago egin zezaketen eta software “maltzurrak” instalatzeko aukera asko zegoen.
Microsoftek ez du afera publiko egin orain arte. Erabiltzaileei lehenbailehen aktualizazioa deskargatzeko eta instalatzeko deia egin die.