Udalbiltza antolatzeko lanetan ez dira alderdiak ari, gizabanakoak baizik, artikuluak dioenez. Galdera nagusia EAJ berriz ere Udalbiltzan sartuko al den planteatzen da. Gonbidapena zazpi lurraldeetako hautetsi guztiei egingo zaiela aurreratu dute, izan edozein alderditakoak, sentitu euskaldun, espainiar edo frantziar.

Euskal Herriko zazpi lurraldeetako hautetsien bilgune hau egun oraindik beharrezko dela defendatzen dute bultzatzaileek, eta 1999an Bilboko Euskalduna Jauregian defendatutako bost printzipio edo helburuak oraindik indarrean daudela.

1- Euskal Herria nazioa dela aldarrikatzea.

2- Euskal Herriaren egituraketa politikoa eraikitzen laguntzea, lurraldetasuna lekuko izanik eta zazpi euskal lurraldeetako udal ordezkariak esparru erkidean batzeko asmoz.

3- Euskal Herriaren nazio eraikuntza bultzatzea, prozesu dinamiko eta demokratikotzat harturik eta euskal herritar guztien erabakimen eta parte hartze askean oinarriturik.

4- Herrialde guztietako udalerrien arteko harremanak eraikitzen laguntzea, hizkuntzaren, kulturaren, kirolaren, ingurumenaren, lurralde antolaketaren, ekonomiaren garapenaren eta ongizatearen alorrean eta beste esparru batzuetan, udal ordezkarien ekintza bateratuei bide emanez.

5- Nazioartean Euskal Herria nazio berezko eta desberdindua dela adieraztea, baita Euskal Herriak nazio gisa jardun nahi duela ere Europako etorkizuneko egituraketan eta erakundeetan.

Udalbiltzaren aurka 2003an egin zen operazio poliziala, 2010ean egin zen epaiketan eta 2011eko urtarrilaren 20an Audientzia Nazionalak jakinarazi zuen absolbitu egin zituela kide guztiak.