Herrien Alderdi Demokratikoko (HDP) hamabi kide eta Cumhuriyet egunkariko bederatzi kazetari atxilotu ditu Turkiako Gobernuak azken astean. Hori salatzeko protestak egin dira munduko hainbat hiritan.
Herrien Alderdi Demokratikoko (HDP) bi presidenteak atxilotu ditu Turkiak azaroaren 4an, Figen Yuksekdag eta Selahattin Demirtas. Horiekin batera, alderdiko beste hamar diputatu ere atzeman ditu poliziak. Barne Ministerioak adierazi duenez, Kurdistango Langileen Alderdiaren (PPK) esanetara jardutea egozten zaie.
Kurduen kontrako jazarpena salatzeko hainbat protesta egin dira Ipar Kurdistanen azken egunotan, liskarrez eta atxiloketez josita egon direnak. Dersimen, esaterako, hainbat gune bonbardatu ditu armadak. Eta Istanbulen dozenaka manifestari atzeman ditu poliziak, negar gasak erabili ostean.
Protesta modura, parlamentutik erretiratzea erabaki du HDP alderdiak. Izan ere, historian demokraziari egin zaion “erasorik ilunena” dela adierazi du. Horren harira, iluntasuna argitzeko pospolo edo kandela bat nahikoa dela esan du Selahattin Demirtasek. Eta “askatasun eta demokraziarako itxaropen bakarra” HDP dela azaldu du Figen Yuksekdagek.
Turkiako Cumhuriyet egunkariko zuzendaria eta zortzi kazetari ere espetxeratu dituzte azaroaren 5ean, PPKren gerrilla babestea eta bultzatzea leporatuta. Horren harira, Turkiako Gobernuak “informazio eskubidea ezabatu” nahi duela adierazi du Baris Yarkadas Alderdi Errepublikanoko diputatuak.
Politikari eta kazetarien atxiloketen aurrean, Turkiaz gain, munduko beste hainbat herrialdetan ere elkarretaratze eta manifestaldiak egin dira. Atenasen, esaterako, Turkiako enbaxadaren aurrean egin dute agerraldia. Alemaniako hiri nagusietan ere protestak izan dira. Baita London, Mosku, Zurich eta Bilbon ere, beste batzuen artean.
Recep Tayyip Erdogan Turkiako presidentearen aurkako estatu kolpea eman zuten uztailean. Ordutik, 180 zinegotzi eta alkate eta 300 ordezkari kurdu atxilotu dituzte, propaganda terrorista egitea leporatuta.
HDPren eskuetan zeuden 24 udalerri ere bereganatu ditu Erdoganen gobernuak. Alderdiko 59 diputatuetatik 56 daude auziperatuta. 510 prozesu judizial batzen dituzte denen artean, gehienak “presidentea iraintzea”, “antolakunde terroristaren aldeko propaganda egitea” eta “talde armatuarekin kolaboratzea” egotzita.
Horrez gain, hamasei egunkari, prentsa agentzia bi, irrati bi, telebista kate bat eta hiru aldizkari ere itxi ditu Turkiako Gobernuak, “Estatuaren kontrako jarrera duten talde terroristekin loturak izateagatik”.
Ibrahim Bilmez abokatua da eta Abdullah Öcalan buruzagi kurdua da bere bezeroa. Bere isolamendua salatu du Euskal Herrian otsailean, Turkiako errepresio eta inpunitate mekanismoak azalduta.
1999ko otsailaren 15ean Abdullah Öcalan atxilotu zuten, Kurdistango Langileen Alderdiko (PKK) eta mugimendu independentista kurduko burua. Turkiako zerbitzu sekretuek Kenyan atxilotu zutenetik, Marmara itsasoko uharte batean dagoen Iämralä-ko kartzelan isolatuta... [+]
Lara Vilanova (1983, Bartzelona) argazkigintza zuzendaria da eta The Return: Life after ISIS, Sinjar, Cuerdas edota Hondarrak filmetan hartu du parte. Abenduan Euskal Herria bisitatu zuen The Purple Meridians topaketetan parte hartzeko Durangon.
Urtzi Urrutikoetxea nazioarteko kazetariarekin mintzatu gara Radio Kobanen, iaz idatzitako Kurdistan-Argi bat ekialde hurbilean liburuari buruz. Testuak azken urteetako gertakizunei erreparatzen die, eta atzerago ere begiratzen du herri kurduaren egoera politikoa eta... [+]