Turismoaren kalteak hiri-ereduarekin lotu ditu Sortuk eta salaketarako ordua dela defendatu

  • Turismo ereduaren inguruko eztabaidaren harira, Sortuk irakurketa plazaratu du. Turismoa zuzenean hiri-ereduarekin lotzen du alderdi independentista ezkertiarrak.

ARGIA @argia
2017ko abuztuaren 04a
Turistak Donostiako turismo bulegoan.

Azken urteetan Donostia bisitatzen dutenen kopurua asko hazi dela eta beren ustez horrek eragindako kalteak zerrendatu dituzte, hala nola, etxebizitzaren arazoa, enpresa transnazionalen presentzia gero eta handiagoa, kultu ekimenen helburua atzerritarrak izatea eta hiriko espazioen ber-ordenatzeak, besteak beste.

"EAJ, PSE eta PP turismo industria basatienari ateak zabaldu eta alfronbra gorria jartzeko lanean ari dira", salatu dute, baita herritarrei zuzendutako "propaganda kanpaina etengabean gutxi batzuen interesak donostiarron interesekin nahastu" nahi dituztela ere.

Beren ustez "geroz eta zailagoa da duintasunezko bizi-baldintzak bermatzea Donostian" eta beharrezkoa da "propaganda kortinaren atzean ezkutatzen dutena agerian uztea eta erantzuleen benetako aurpegia ikustaraztea".

Azkenik, komunitateak sendotu eta antolaketan indarrak jartzera dei egin dute. "Herri-eragileek eta ekimen komunitarioek funtsezko papera jokatzen dute. Auto-antolaketa bidez lor dezakegu gutako bakoitzaren eta ingurukoen bizi-baldintzak hobetzea".

Irakurri Sorturen irakurketa osorik

Turismoaren fenomenoa aspaldidanik da ezaguna Donostian. XIX. mendean zabaldu zenetik aurrera, hiriko bizitza sozialean eta donostiarren bizi-baldintzetan eragin zuzena izan du. Izan ere turismoa hiri-ereduarekin zuzenean lotzen den gaia da: hiriaren ehun-ekonomikoa, nortasuna, espazio publikoaren konfigurazioa eta herritarren bizi-baldintzez ari gara. Hiri-mailako eztabaida zabalaren ordua da. Eztabaida honen bidez sortutako konplizitate eta aliantzak bestelako hiri-eredua eraikitzeko indarrak metatzeko balioko digute; azken finean, herritarrak oinarrian dituen hiri ireki eta abegikorra eraikitzeko.

Azken urteetan, Donostia bisitatzen duten pertsona kopurua asko hazi da eta zenbait ondorio kaltegarri nabarmen handitu dira:

  • Dagoeneko larria zen etxebizitzaren arazoa areagotzea ekarri du. Espekulatzaileek hiriko higiezin ahalik eta gehien erosteko estrategia basatia martxan dute. Apartamentu turistikoen ugaritzeak hiriko alokairuzko etxebizitza merkatua lehertu du.
  • Hiriaren erdigunea transnazional kapitalisten eskuetan geratzen ari da.
  • Turista gehien pilatzen diren guneetan prezioen igoera oso handia eman da; prezio altuak, Donostia bisitatzen duen turista profilaren errentari egokitutakoak. Honela, gune horiek erabat ukatzen zaizkie donostiar asko eta askori.
  • Kultur ekimen publikoak bisitariak erakartzeko helburuaren arabera planteatzen dira; sorkuntza lanak marketing tresna gisa soilik dira baloratuak, produktuak edo hiria bera saltzeko baliagarritasunagatik. Gauza bera gertatzen da euskara eta kultura herrikoiaren elementu ororekin.
  • Donostiako hiri-espazioak ber-ordenatzen eta diseinatzen dira, kapital irabazia handitu eta kontsumoa sustatzeko irizpide arabera soilik. Horri lotuta dago, esaterako, ondare arkitektonikoaren suntsiketa, operazio urbanistiko errentagarriagoen mesedetan; edo kaleetan negozioak hedatzeko jartzen diren erraztasunak.

Turismo industriaren nazioarteko marrazoek hiria, bere espazioak eta bere nortasuna erosi nahi dituzte espekulatu, zukutu, erabili eta botatzeko. Bertako kapitalak ere aurkitu du bere lekua higiezinen eta ostalaritzaren sektoreetan jabetzak pilatuz, besteak beste. EAJ, PSE eta PPk, gobernatzen dituzten erakunde guztietatik, turismoaren industria basatienari ateak zabaldu eta alfonbra gorria jartzeko lan egiten dute. Aldi berean, herritarroi begira propaganda kanpaina etengabean dihardute gutxi batzuen interesak donostiarron interesekin nahastu nahian.

Eta herritarren artean eztabaida pizturik dago. Turismoak onura besterik ekartzen ez duela esaten diguten honetan, donostiarrak, ohartzen ari gara gero eta zailagoa zaigula gure hirian bizitzea. Aipatutako kalteek Donostiatik bota gaitzaketen indarrak sortzen dituztela; gero eta zailago zaigula duintasunezko bizi-baldintzak bermatzea hiri honetan; bizilekua ordaintzeko ahalegin ikaragarria egin behar dugula, ezinezkoa askotan;  prezioak ez direla gure soldata eta pentsioekiko proportzionalak; prekarietatea eta behin-behinekotasuna direla sortzen den enpleguaren ezaugarriak; auzoetako komunitate-harremanak ahultzen eta arriskuan jartzen ari direla; gure hirian arrotz eta deseroso sentiarazten gaituztela gero eta gehiagotan.

Hasieran esan bezala, indarrean dagoen turismo-ereduaren kalteez ari garenean, hiri-ereduaz ari gara. Donostiarron bizimodua da jokoan dagoena: gure beharrak; gure bizitzen gain erabakiak hartzeko dugun burujabetza, azken finean. Horregatik, bizitzaren eremu askotan eragiten diguten ondorio hauei, erantzuna ere hainbat eremutatik eman beharko diegu.

Lehenik eta behin salaketarako ordua da. Turismo eredu oker honen esku hartze agresiboenak pairatzen dituzten zonalde eta sektore sozialetako herritarren pazientzia agortu eta haserrea agertu da, kasu batzuetan. Bertako eta nazioarteko kapitalaren jabeek eta hauei bidea zabaltzen dieten indar politikoek gutxiengo baten interesen mesedetan lan egiten dute, herritarron gehiengoa kaltetzen duten bitartean. Propaganda kortina koloretsuaren atzean ezkutatzen dena agerian uztea lehentasuna da eta erantzuleen benetako aurpegia ikusaraztean jarri behar dugu indarra.

Erakunde publikoetan ere badago zer egina. Indarrean dagoen ereduari mugak jarri, sortzen dituen kalteei erantzun eta eredu berri baten norabidean alternatibak planteatzeko unea da. Hiri-ikuspegi integralarekin jokatzeko ordua da, Donostian lan eta bizitzeko baldintza duinak bermatzeak gidatu behar gaitu, beste ezeren aurretik.

Eta azkenik, komunitate mailan egin beharreko lana dugu. Herritarrok, epe-motzeko etekin ekonomikoen aurretik arduraz jokatu eta gure ingurune sozialaren garrantziaz eta balioaz jabetu behar dugu. Elkar zaintzen duten komunitate ahalik eta sendoenak soilik dira hirira heldu dena bezalako olatua gainditzeko gai. Gure bizimoduaren alderdi guztiak merkatuaren baitan kokatu nahi dituzten indarren aurrean, antolaketak babesten gaitu. Donostiar bakoitzak dituen behar ekonomikoak, sozialak, emozionalak, elikadurakoak, kulturalak, osasun arlokoak, energetikoak edo dena delakoak, komunitatean, era kolektiboan, lantzera jo behar dugu. Herri-eragileen eta ekimen komunitarioek funtsezko papera jokatzen dute horretan. Auto-antolaketa bidez lor dezakegu gutako bakoitzaren eta ingurukoen bizi-baldintzak hobetzea. Gertukotik eta txikitik abiatuz, bakoitzak ahal duen ekarpena eginez, sortuko dugu merkatuaren arauetatik kanpo funtzionatzen duen sarea gero eta handiagoa, gero eta trinkoagoa izatea. Eta sare hori da, gure hiria lapurtu eta bertatik kanporatu nahi gaituzten honetan, hiri-eredu justuagoa, bizigarriagoa, eraikitzeko oinarria.

Antolakuntzaz, burujabetza osoa!

Donostiako SORTU

2017ko abuztua

 

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Turismo masiboa  |  Sortu  |  Donostia

Turismo masiboa kanaletik interesatuko zaizu...
Okupazio berria Donostiako Alde Zaharrean
"Okupazio eta autogestioaren sokak ez du etenik"

Auzoarentzako lokal bilakatu nahi dute. Azkenaldian okupazio saiakera gehiago egin dira.


San Sebastian Pirates International Week
MULTIMEDIA - bideo herrikoia

"Donostiak urteak daramatza nazioartera begira. Looking to the world. Ez al gara ba, gu ere, mundu zabal eta anitz honetako hiritarrak? Donostiar citizens? Piratok aurten brainstorm sakona egin dugu gaiaren inguruan. Urte osoan eta udaran bereziki, Donostia turistaz beterik dago. Zer izango litzateke gure Aste Nagusi Pirataz kanpotik datozkigun lagun horiengatik izango ez balitz. Horregatik, erabaki garrantzitsu bat hartu dugu. Bye bye Donostiako Piratak. Welcome San Sebastian Pirates... [+]


Turismo eredua hankaz gora
Nola bidaiatu piztia elikatu gabe?

Turismoa anabasa eta kaosa batzuentzat, aberastasun eta oparotasun iturri besteentzat. Egungo ereduak, baina, tarte txikia uzten du imajinazioarentzat: kontsumoa, masifikazioa eta gentrifikazioa eguneroko hiztegian sartu ditugun hitzak dira. Ba al da egoera honi buelta emateko aukerarik? Ba al daude oporrak kanpoan emateko beste modu batzuk? Egungo egoeraz eta bestelako eredu posibleez jardun gara hurrengo lerroetan.


2018-06-19 | ARGIA
Hasi da turismo denboraldia, baita protestak ere Bartzelonan: GŁell parkean kateatu dira ekintzaileak

Bartzelonako Güell parkean Arran gazte erakundeko hainbat kide kateatu egin dira eta turismo masiboaren aurkako pankartak zintzilikatu dituzte.


Herri boteretik "Euskal Erregimena" borrokatuz

Maiatzaren 19tik 27ra Bizitza Da Handiena kanpaina gauzatu dute Donostian. 63 herri mugimenduk eta sindikatuk “borroka sozialen astearekin” bat egin dute, eta “herritarron kapitala” aldarrikatu dute. Lubaki desberdinek fronte bakarra osatu dute. Ozenen entzun den oihua turistifikazioaren aurkakoa izan da, izan ere, Turismoaren Mundu Erakundeak goi-bilera hirian egin behar zuen egunekin bat egin du mugimendu desobedienteak.


Citizens of Donostia to the World Tourism Organization: "We don't agree"

The Bizitza da handiena ('Life is the Greatest Thing') campaign was held in Donostia from 19th to 27th May. 63 citizens' movements and trades unions joined in with the "social struggle week" and proclaimed the need for a "citizens' capital". Different trenches have made up a single front. The anti-tourism protest got its message across, the World Tourism Organization holding its highest level meeting in city during the same week as the protest movement.


Botereari erronka

Batek sudur gorriak, besteak buruberoki makarra. Trikitixa eta pandero hotsek girotuta, Bizitza Da Handiena asteari bide eman diote. 60 herri mugimendu eta sindikatuk deituta “boteretik herritarren aurka egiten ari diren politikei” aurre egingo diete. Lehen ekintza indartsu gisa, hamasei urtez hutsik izan den zortzi solairuko eraikina okupatu dute Donostiako erdialdean, turistifikazio prozesu basatiaren erdian, 300 lagun kalean bizi diren hirian.  Munduko Turismo Erakundearen... [+]


Turismo-eredu blindatua herri boteretik ziztatzen

Donostiako Idiakez kaleko eraikin okupatuak, Bizitza Da Handiena kanpainako kideek "Herritarron Etxea" izenpetu dutena, zutik dirau, borroka sozialen astearen sinboloak tinko mantendu ditu zimenduak. Zutik dirau Bizitza Da Handiena kanpainak berak, ez baitu imintzio dardaratirik erakutsi hamasei identifikazio, beste hainbeste borra-kolpe eta bi atxilotu jasan izanagatik ere.


2018-05-24 | ARGIA
Azken txanpan sartu da Bizitza Da Handiena: pentsiodunen manifestazioa eta okupazioaren azken gaua

Maiatzaren 19tik 26ra Donostiako kaleetara ateratzeko dei egin du Bizitza da Handiena kanpainak. "Agintetik aurrera eramaten ari diren herritarron aurkako politiken aurka" eta "herritarron kapitalaren alde" egitea du helburu, eta hainbat sindikatu eta herri mugimenduk atxikimendua adierazi dute sare sozialetan. Turismoaren Mundu Erakundea asteartean iritsi da Donostiara, eta Bizitza Da Handienak ekimen ugari antolatu ditu horren kontra.


Azkenak
EGILEA
Eguneraketa berriak daude