CGT sindikatuak proposatu du TRWko langileen lan-orduak sei ordutara jaistea 123 langileen kaleratzea eragozteko. Otsailaren 24ean onartu zen 123 langileen kaleratzea eragiten zuen Enplegu Erregulazio Espedientea (EEE), 327 aldeko botoekin, 223 aurkakoekin eta hamar bozka zurirekin.

Neurri hori proposatu zioten zuzendaritzari EEEaren inguruan izandako bileretan, baina enpresak ez zuen aintzat hartu, sindikatuak gogorarazi duenez. “Enpresaren ordezkariek ez dute arrazoi bakar bat ere eman proposamen hori ez onartzeko”, kritikatu dute langileek.

Sindikatuak adierazi du 123 kaleratzeekin “dirua galtzen” jarraituko duela enpresak; 12 milioi euro galduko ditu 2016an, eta 14 milioi euro 2017an. CGT sindikatuak ziurtatu du, ordea, sei milioi euro aurreztuko lituzkeela enpresak neurri horrekin. “Enpresari berdin ateratzen zaio ekonomikoki hiru pertsona zortzi orduko lanaldian (hiru txanda egunean), edo lau pertsona sei orduko lanaldian (lau txanda egunean) mantentzea”.

Sindikatuaren ustez, proposamen horrek “gastu soziala murrizten du, indemnizazioak eta langabezia prestazioak saihesten ditu, eta Gizarte Segurantzako kotizazioak mantentzea dakar. Bizitza familiarraren eta laboralaren kontziliazioa onartzen du, eta ekonomikoki abantailak ditu TRW enpresarentzat”. Hori dela eta, langileek nabarmendu dute lanaldia murriztearen proposamena, edota kaleratzeak ekidin ditzakeen beste edozein aukera garatzeko lan egingo dutela.