Lüküzeko Barthelemy Aguerrek eta Armendaritzeko Lucien Delgue auzapezek Herri Elkargoa egitasmoaren aurkako helegite hierarkikoa aurkeztu omen dute. Zer iritzi duzu horretaz?

Nik ez dut helegite hierarkiko hori eskuratu. Hala ere, Parisko Barne ministeriora iritsi dela badakit. Ez dut ezagutzen bere edukiera, ezta sinatzaileen izenak ere. Dena den, ez nau harritu Barthelemy Aguerrek eta Lucien Delguek helegitea jarri izanak. Aguerrek Departamenduko herrien arteko Komisioan egina zuen proposamena, Euskal Herriko herri multzo bat eta Biarnoko herri multzo bat elkargo bakarrean baterazteko. Erran dezagun, bere proposamena ikonoklasta samarra dela. Departamenduko komisioak ez zuen proposamena aintzat hartu. Izan ere, helegitearen bultzatzaileek erabaki politikoak tribunalek hartzea nahi dute, herritarrek hartu beharrean. Hau da, tribunalek ezin dute erabaki herri demokratikoaren ordez. Herrietako kontseiluak ari dira hautatzen eta erabakitzen proportzio zinez garrantzitsuan. Udal kontseiluetako %74k aldeko bozka eman du, biztanleriaren %67koa ordezkatzen dutenak, erabaki demokratiko hori gehiengo bati atxikita dago. Gu sistema demokratikoaren barnean ari gara. Orduan, abokatua naizen aldetik, 37 urtez zuzenbidean aritu naizen honek ez du erranen horrela jokatzea eskandalagarria denik, aldiz erran dezaket, benetan, horrela jokatzen dutenak ez direla faborerik ez plazerik emateko ari.

Zer helegite mota da hau. Eraginkorra izan al daiteke?

Helegite hierarkikoa, helegite administratiboa da. Helegite administratiboa auzi-prozesuaren aurrekari bat izan daiteke. Herri Kontseiluen erabakiaren aurka joateko argudio juridikoak izan daitezke, baina kasu honetan, erabakia ez da juridiko soila, erabaki politikoa ere bada. Nik nahiago dut argudio politikoak izatea, argudio juridikoak baino. Eta pentsa abokatu batek mintzo zaitu. Argudio juridikoak asko erabili daitezke, baina argudio politikoak ez ditut oraindik entzun, bat bera ere sendoa.

Helegitea aurkeztu dutenek politika egiteko manera da, antza.

Nik ere politika egiten dut. Denok egiten dugu politika, baina badira erak eta manerak. Nik ez dut proiektuaren aurka egotea deitoratzen, HELEPen (Herriarteko Lankidetzarako Erakunde Publikoa) edo Herri Elkargo bakarraren kontrako egiteko aukera badago. Baina, helegitearen bultzatzaileek azaldu behar dute zergatik, orain, Frantziako Estatuak lehen aldiz Herri Elkargoa edo instituzioa sortzeko proposamena egin duenean, gehiengoak bultzatua, gehiengoak baietz erabaki ondoren, tamaina horretako erabakia hartu denean, zergatik kontra diren horiek hartu duten tamaina horretako jarrera eta erabakia? Tribunaletara jotzea, alegia.