Ehunka ordu eman ditugu 1004 zenbakira deitzen, eta beti erantzun berdina eman digute: arazorik ez dagoela; eta gainera, gure deia beste zerbitzu batzuk eskaintzeko baliatzen dute, hain zuzen ere estaldura faltagatik eskuraezin ditugun zerbitzuak eskaini ere.

Egoera ulertzeko, aipatu behar da gure herrian telefono linea berri bat eskuratzeko, norbaitek baja egin behar duela, linea kopurua beteta dagoelako. Interneteko abiadurari dagokionez, egoera hoberenetan 2,5 Mgps-eko abiadura dugu deskargatzeko, eta “normal” dabilela diogu. Abiadura froga edo “test de velocidad” egitean, 0,4 Mgps-eko abiadura ematen du beste batzuetan, eta beste egun batzuetan, linea erabat kolapsatuta egoten da eta lana beste momentu baterako uztea izaten da egokiena.

Gure herrian bizi garenotako batzuek Interneten bidez egiten dugu lan; UEUn, itzultzaile lanetan, informatikariak...

Askotan entzun izan dugu jende gutxi eta urrun bizi garela, ez dugu inoiz aditu ordea berdin ordaintzen dugula zerbitzurik jaso gabe.

Urteak daramatzagu egoera honetan, eta telefono enpresei deitzeaz nekatu gara; zerbitzua ez dute hobetzen hitz eman diguten bezala, argi dago buruan duten gauza bakarra errentagarritasuna eta diru irabaziak direla.

Horregatik uste dugu, telekomunikazio afera hau zerbitzu gisa ikusiko dutelakoan, batzuetan lana eduki ahal izateko ezinbesteko baldintza den heinean, gure hurbileko erakundeengana zuzendu behar garela.

Arabako, Gipuzkoako, Bizkaiko eta Nafarroako gobernuei eskatu nahi diegu nazionaliza ditzatela telekomunikazioak, edo eman ditzatela legeak, beste herrialde batzuetan (Frantzia, Finlandia..) dituzten zerbitzuak eta kostuak hemen ere eskaini ahal izateko.

Eta Basaburuako Udala kudeatzen duten pertsonei ere eskatzen diegu gure ahotsa entzun eta norabide honetan indarra egin dezatela.

*Edurne Koch, Gorka Etxeberria eta Iraia Amundarain
(Aizarozko Auzo Elkartearen izenean)