Istripu larria Tarragonako poligono petrokimikoan gertatu da astearte arratsaldeko zazpietarako minutu gutxi falta zirenean.  Hiriburuaren mugan dagoen poligonoa da Espainiako estatuko petrokimika kontzentrazio handiena daukan eremua. Bertan etileno oxikoaren ekoizpenean ari den Industrias Quimicas del Óxido de Etileno S.A. (IQOXE) usinan leherketa oso bortitz bat entzun eta ikusi da, hainbat herritarrek ateratako argazkietatik ezagutarazi dena.

Inguruan ari ziren zortzi langile artatu behar izan dituzte erredura eta zauriengatik baina handik urruti, ia hiru kilometrotara Torreforta auzoko bere bizilekuan zegoen herritar bat hil du IQOXEren leherketak aireratu duen 800 kiloko xafla batek. Lehen informazioetan galdutzat ematen zen beste langile bat da, enpresako kamioilaria antza denez, asteazken goizaldean sorospen zerbitzuek hilotz aurkitu duten bigarrena.

30 suhiltzaile ekipok aritu behar izan dute garrak itzaltzeko lanean eta gau osoan zehar etenda egon dira bai inguruko errepideak eta baita trenbidea ere. Larrialdi kimikoaz inguruko herritarrak ohartarazi behar lituzketen sirena hotsik ez da entzun. Agintariek La Canonja, Vilaseca eta Tarragonako hiru auzunetako herritarrei eskatu diete beren etxeetatik ez ateratzeko, nahiz eta eztandaren biharamonean Joaqim Torra presidenteak adierazi duen kutsadura arriskurik ez dagoela.