Araba eta Gipuzkoako suhiltzaileek abenduan irregulartasunak salatu zituzten 2022ko azaroko oposizioaren gainean. Besteak beste, kexa nagusietako bat izan zen hautaketa proba Jaurlaritzaren polizia akademiaren mende utzi izana, eta azterketa psikoteknikoak garrantzia handiegia izatea. Orain, beste kexu bat salatu dute, euskarari dagokiona.

ELA sindikatuak salatu du Arkautik ukatu egin diela Araba eta Gipuzkoako suhiltzaileei oposizioetako azterketa psikoteknikoa euskaraz egin ahal izatea, nahiz eta hautagaiek espresuki hala eskatu. Prozedura ez daukate homologatuta euskaraz egiteko.

Gainerako azterketa teorikoa zuzenean gazteleraz egin zuten: “Bestelako azterketak ere euskaraz egin nahi izan zituzten, baina ikasketa material gehiena gaztelania hutsez egonik gaztelaniaz egitera behartuta ikusi zuten beren burua”, azaldu du ELAk.

Sindikatuak demanda aurkeztu du epaitegian, eta Arartekoak ere ebatzi du euskaldunen hizkuntza eskubideak urratu dituztela Arkautiko hautaketa prozesuan. Azterketa gazteleraz egin behar izatearen ondorioak azpimarratu ditu ELAk: “Ikasketa prozesu luzea eta gero, hautaketa froga bat gaztelaniaz egin behar izateak hautagaiei zailtasun gehigarri bat dakarkie”.

Gainera, hasiera batean uste zuten euskaraz izango zela, eta egunean bertan jakin zuten ez zegoela horretarako aukerarik. Sindikatuak argitu duenez, 2022ko azaroko azterketa baino hilabete lehenago epaimahaiari galdetu zioten ea psikoteknikoa euskaraz egin ahal izango zuten, eta baiezkoa eman zieten. Ez zen hala izan, eta hautagaiek erreklamazioak jarri dituzte, baina atzera bota dituzte denak.

ELAk salatu du hizkuntza eskubide urraketa larria dela, kontuan izanda oposizio publikoa dela. Ohartarazi du administrazioak eragindako estres linguistikoak hautagaiak bultzatzen dituela azterketak zuzenean gazteleraz egitera. Arkautiri exijitu diote 2022ko oposizioetako azterketa psikoteknikoa baliogabetzea eta berriro euskaraz egiteko aukera ematea edo kalifikazioa moldatzea.