Gerrarako danbor hotsak geroz eta ozenago entzuten dira Europan, eta horren adierazle da azkeneko urteetan Europar Batasuneko (EB) estatu kideen defentsa gastuek izan duten igoera: Europako Batzordearen arabera, azken hamar urteotan "nabarmen" igo da estatu kideen batez besteko gastu militarra, %2ra heltzeraino, eta martxoan aurkeztutako berrarmatze planean aurreikusi zuten beste %1,5 igotzea lau urteren buruan; denera 650.000 milioi euro. Horrez gain, derrigorrezko soldadutzaren mamua Europako herrialde guztietara hedatzen ari da; azken kasua Alemaniarena izan da: Boris Pistorius (SPS) herrialdeko Defentsa ministroak borondatezko zerbitzu militarra ezarriko lukeen lege proiektua onartu du asteazkenean.

Lege proiektu horrek barne hartzen ditu zerbitzu militarra derrigorrezkoa izatea bihurtuko luketen bi baldintza: segurtasun mailari dagokionez eta boluntarioen faltagatik "beharrezkoa" denean. Bi kasuetan, derrigorrezko soldadutzaren ezarpena Alemaniako Parlamentuak onartu beharko luke. Pistoriusen arabera, borondatezko zerbitzu militarra 18 eta 25 urteko gazteei zuzenduta egongo da, eta aurreikusten dute zerbitzua 15.000 lagunekin hastea. Gazte gehiagok izena emateko, ordea, zerbitzua "ekonomikoki erakagarria" izatea nahi du Defentsa ministroak: horretarako, hilabetean 2.000 euro gordin irabaziko dituzte soldadutza egiten ari direnek.

Pistoriousek adierazi du lege proiektua "aurrerapauso handia" dela, eta gizartearen "pentsamendua" aldatzea helburu duela: "Egungo nazioarteko testuingurua dela eta, gazte bakoitzak erabaki beharko du nola lagundu diezaiokeen Alemaniaren segurtasunari". Herrialdeko kantziler Friedrich Merzek, berriz, azpimarratu du Errusia Alemaniaren segurtasunerako eta defentsako mehatxua dela, eta, hortaz, bi auzi horiek gobernuko agenda politikoan berebiziko garrantzia dutela.

EBko estatu kideen joera

Egun, EBko 27 estatu kideetatik bederatzitan da derrigorrezkoa zerbitzu militarra egitea; horietatik gehienak Eskandinaviakoak eta Baltikokoak dira.

Hain zuzen, uztailean Danimarkak emakumezkoen derrigorrezko soldadutza ezarri zuen. Vilaweb hedabideak jaso zuenez, gobernuak arrazoi ideologikoak azaldu zituen erabakia argudiatzeko, alegia, derrigorrezko soldadutzan “genero berdintasun erabatekoa” bermatzeko erabakia dela adierazi zuen Defentsa Ministerioak. Gainera, testuinguru geopolitikoaz ere mintzatu ziren: batetik, Errusiarekin tentsioa areagotzen ari dela, eta bestetik, AEBek gero eta presio handiagoa egiten dietela Europako herrialdeei defentsan baliabide gehiago jar dezaten.