Sekretu komertzialak babesteko legea lantzen jardun duen taldeak testu bateratu bat sortu du, Europar Batasuneko estatu kideen artean gaiari dagokionez dagoen aldeari aurre egin nahian. “Zilegi ez den sekretu komertzialen eskuratzea, erabilera eta hedatzea saihestu” nahi du araudiak.

Adierazpen askatasunaz ere mintzo da testua. “Interes orokorraren defentsan jarduten den kasuetan”, informazioaren eskuratzea eta hedatzea zilegi litzateke; ez litzateke arau hauste kontsideratuko. Hala azpimarratu zuen Europako batzordeko kide Christian Wigandek: “Sekretuak gehiegikeria islatzen badu eta berori argitaratzeak mesede egiten badio interes publikoari, ez litzateke araudiak aurreikusitako zigorrik aplikatuko”.

Informazio eskubidea ezbaian

Araudi berriaren aurkako ekintzaileen aburuz, neurria “mehatxua da kazetari, informatzaile eta enpresetako langileentzat; eta interes publikoko informazioa eskuratzeko eskubidearen aurka doa”. Langileen ezagutza enpresen ondasun bilakatuko litzateke.

Sarearen demokratizazioaren alde jarduten duen Xnet taldeko kide Alfonso Sanchezek salatu du Europako batzordeak sekretu komertzialei emaniko definizioa ez dela egokia: “Enpresa baten sekretu komertzialak lehiakideengandik babestea izan beharko luke xede araudiak, baina harago doa eta enpresaren informazio guztia hartzen du bere baitan”.

“Erakundeek interes orokorra eta oinarrizko eskubideak errespetatu direla esango dute, baina hori ez da egia”, adierazi du Xnetek. Gaineratu dute “ustelkeriaren, gehiegikerien eta informazio askatasunaren aldeko borrokaren” aurka doala araudia eta PSOEren jarrera “hipokrita” kritikatu dute, “aldeko bozka emateagatik”.