Euskal presoen politikoen aldeko eskubideak aldarrikatzeko hainbat pertsona bildu dira larunbatean Azpeitiko Loiolako Basilikan. San Inazio eguneko ospakizun katolikoa probestu du Etxerat elkarteak politikariei informazioa helarazteko.

Etxeraten arabera aurtengo uztailean Euskal Preso Politikoen Kolektiboko (EPPK) 428 preso zeuden Espainiako eta Frantziako estatuko 76 kartzelatan. 352 presoren familiak eta lagunek 500 kilometro baino gehiago egin behar dituzte lagun edo senidea bisitatzeko, 166 preso etxetik 500 eta 790 kilometrotara daude, 800 eta 990 kilometro artean daude beste 122 preso eta 64 dira Euskal Herritik 1.000 kilometrotara baino urrunago daudenak. 

Sakabanaketa “Espainiako Kode Penaleko oinarrietan jasotzen denaren aurkakoa” dela esan dute Etxerateko kideek. Presoen aldeko elkarteak egoera horren ondorio zuzenak ere azpimarratu nahi izan ditu. Azken 25 urteetan errepidetan presoak bisitatzera joandako 16 lagunek bizitza galdu dute errepidean. Sakabanaketak gastu ekonomiko “jasanezinak” ekartzen dizkiela ere gaineratu dute.

“Dispertsioarekin bukatzeko beharrezkoa den borondatea benetan agertzeko” eskatu dio Etxeratek Eusko Jaurlaritzari, eta “hitzetatik ekintzetara” igarotzeko.

Hondartzetan protestak

Asteburuan sakabanaketaren aurkako protestak izan dira Euskal Herriko hondartzetan. Donostian egin da ekitaldi nagusia eta Nautikotik La Perlara bitartean giza-katea osatu dute. Etxerateko kide Josune Dorronsorok adierazi du euskal presoen aurkako egungo sakabanaketa politika “suntsipen” politika dela. 

Donostiaz gain, Gipuzkoan Deban eta Orion egin dituzte protestak. Bizkaian aldiz, Lekeition, Ondarroan, Mundakan, Ea-n eta Plentzian mobilizatu dira presoen sakabanaketaren aurka.