800.000 pertsona hil zituzten Ruanda 1994an, Hutuek Tutsisen aurka eginiko gerra etnikoan. Genozidiotzat jotzen den gertakarian, Frantziako Estatuak zerikusi zuzena izan zuela azpimarratzen du AEBtako Cunningham Levy Muse abokatuek, AlJazeerak jaso duenez: Frantziako Gobernuak baimenduta, hainbat militar frantsesek Ruandako genozidioaren erantzuleei armak ematen zizkietela ondorioztatu dute, besteak beste.
Ikerketak zehazten duenez, genozidioa gauzatu zuten buruak epaituak izan ez zitezen ahalbideratu zuten Frantziako hainbat agintarik. Gainera, Ruandako enbaxadan lan egiten zuten funtzionario frantsesek genozidioaren arduradunei babesa ematen zietela ere ebatzi dute. Egileek diote sarraskiaren ostean eratu zen gobernu berria Frantziaren laguntzarekin sortu zela eta badirela hori frogatzen duten agiriak.
“Gardentasun faltagatik” eta “egia ez esateagatik”, txostenaren egileek gogor kritikatzen dute Frantziako Gobernuak Ruandan gertatutakoaz 1998an egin zuen ikerketa bat: Frantziaren eta genozidioaren buruen artean harremanik ez zela zioen, baina ikerketa berri honek lotura uste baino estuagoak zela zehazten du: “Frogak argiak dira eta hori frogatzen duen testigantzak ere bildu ditugu”, diote abokatuek.
Kontsultatu txostena osorik PDFan.