Auzitegi Nazionaleko Jose De la Mata epailea izan da miaketa agindu duena, ikerketa iturrien arabera, Jordi Pujolen zazpi seme-alabek jatorri ilegaleko dirua mugitu izana erakusten duten frogak eskuratu ondotik. Froga hauek Andorrako autoritateek bidalitakoak dira, eta aipaturiko iturrien arabera, agerian uzten dute familiak Andorran zituen banku kontuetan mugimendu arraroak izan zirela, eta horietan protagonista batik bat Jordi Pujol Jr. izan zela. Horrela, El Pais kazetaren esanetan, Pujoldarren seme zaharrena da gaur goizeko polizia operazioaren jopuntu nagusia.

Guztira 14 dira momentuz egiten ari diren miaketak, 12 Bartzelonan eta 2 Madrilen. Operazioak ez dio soilik Pujol familiari eragin; polizia, besteren artean, Carles Vilarrubi Bartzelona futbol taldeko presidenteordearen eta Carles Sumarroca enpresaburuaren etxebizitzetan ere izan da.

Ikerketa iturrien arabera gaur ez da atxiloketarik izango, baina Pujoldarrak ustelkeriarekin loturiko delituengatik inputatzea aurreikusten da. Delitu horien artean egongo lirateke delitu fiskala, dirua zuritzea, iruzurra eta Estatuaren ondarearen aurkako delitua.  

Ustelkeriak lehenago ere zipriztindutakoa da Pujol familia

Gaurko miaketek 2012an Jordi Pujol Jr.-en aurka hasitako operazioarekin zerikusia dute, aipaturiko iturriek adierazi dutenez. Auzitegi Nazionala Pujol bere bikotekide ohi Victoria Alvarezek jarritako salaketaren ostean hasi zen ikertzen. Honek salaketan zehaztu zuenez, Pujol sendiko seme zaharrena diruz beteriko poltsekin joaten zen Andorrara, eta horren atzean iruzur fiskala eta diru zuritzea egon zitekeen.

Egoera horretan, 2014an Generalitateko presidente ohiak atzerrian erregularizatu gabeko kontuak zituela aitortu zuen, kontu horiek familiako herentzia bati zegozkiola azaltzearekin batera. Horren ondorioz Jordi Pujol, haren emazte Marta Ferrusola eta Pedro, Mireia eta Oleguer seme-alabak auziperatu zituzten, kontu horietan zuten dirua modu ilegalean lortua zelako ustean.