1. Goi-karguak “adostasunez” izendatu

Pablo Iglesiasek proposatu du koalizio gobernua osatzen duten alderdiek “adostu” behar dituztela goi karguak. “Figura batzuk oso garrantzitsuak dira herrialde baten demokratizaziorako, eta horiek ezin dute politikarekin loturarik izan. Pertsona horien independentzia ezinbestekoa da instituzioak eguneratzeko”.

Honako hauek dira adostu beharko liratekeen goi-karguetako batzuk: Espainiako Bankuaren presidentea, Kontseilu Ekonomiko eta Soziala (CES), Zerga-Agentziako zuzendaria, Kontu Auzitegiko fiskaltza, edota Konpetentzia eta Merkatuen Batzorde Nazionaleko (CNMC) presidentea, besteak beste.

2. Barne ministerioaren menpe ez dagoen unitate poliziala

Unitate polizial judizial independentea sortzea. Gaur egun, Polizia Judiziala Instrukzioa Epailearen eta Barne Ministerioaren menpe dago, eta Podemosen helburua da, hain zuzen, Unitate Polizial independentea sortzea, auzitegiekin eta tribunalekin soilik harremana izango duena. Horrek eragingo luke Barne ministroak Poliziaren kontrolaren zati txiki bat galtzea.

3. Kataluniako erreferenduma  

Podemosen ustez, “momentu honetan ezinbestekoa da Kataluniarrei beraien etorkizun politikoaren inguruko erabakitzeko eskubidea gauzatzea ahalbidetuko dien erreferenduma egitea”.

PSOEren jarrera ere argia da, ordea. Komite Federalak “marra gorria” jarri dio Pedro Sanchezi: ez negoziatzea erreferenduma proposatzen duen inorekin. Sanchezek ordea, Iglesiasekin hitz egiteko prestutasuna azaldu du.

4. Bruselarekin negoziaketa

Proposamen ekonomikoan, “bat datoz hainbat puntutan”. Edonola ere, Podemosen proposamena zabalagoa da fiskalitateari dagokionez, eta Bruselaren oniritzia behar dute defizitaren helburuak lortzeko eta gastu publikoa handitzeko.

Bi alderdien helburuak ezberdinak dira: PSOEk zehaztu du ez dituztela 2016rako exijitutako murrizketak beteko, eta defizitaren birbanaketa eskatuko dutela, Espainiako Estatuaren zuloa %3 baino beherago jaisteko (2017ra arte). Podemos ordea, 2019a baino lehen Barne Produktu Gordinaren %2,2 baino gehiago murriztearen aurka dago.

5. Politika fiskala

Podemosek politika fiskala “progresista” egin nahi du; Pertsona Fisikoen Errentaren gaineko Zerga (PFEZ) aldatu nahi du. PSOEk, bere aldetik, beste zerga batzuen bilketa handiagotu nahi du, baina ez du PFEZ ukitu nahi.

Horretaz gain, Iglesiasen alderdiak finantza erreskatea autofinantzatzeko zerga bat du buruan; datorren bi legegintzaldietan bankuei jarriko lieken zerga da, eta 40.000 milioi euro baino gehiago jasoko lituzke erreskate fondoak. PSOEk, ordea, ez du presio fiskala hainbeste handitu nahi, eta ingurumenarekin edota ustelkeriaren aurkako borrokarekin lotutako zergak soilik moldatu nahi ditu.