Koronabirus garaiaren ondoren, joan den ostiralean ekin zien Sarek euskal presoen aldeko hil amaierako ostiraletako mobilizazioei. Dinamika horren barruan LABek manifestazioa egin du ostiral honetako eguerdian Iruñean.
Dozenaka lagunek, bi hilaratan eta pertsonen arteko distantzia mantenduta, egin dute mobilizazioa Iruñeko kaleetan zehar, "Euskal Presoak etxean eta bizirik nahi ditugu" goiburupean. "Euskal presoak etxera" edo "Presoak borrokan gu ere bai", izan dira jaurti dituzten oihuetakoak.
LABek jakinarazi duenez, hasiera batean Alde Zaharrean zehar egin behar zuten manifestazioa, baina ibilbidea aldatu diete eta Zabalgunean egin behar izan dute. Gazteluko Plazan amaitu da mobilizazioa Imanol Karrera Nafarroako LABeko koordinatzaileak egindako hitzaldiarekin: "Orain arte egin dugun bezala, mobilizatzen jarraituko dugu; instituzioak ere interpelatu behar digutu, baina horretarako aktibazioa soziala ezinbestekoa da".