Presio fiskala handitu nahi du Eusko Jaurlaritzak
Josu Erkoreka Eusko Jaurlaritzako bozeramaileak atzo Radio Euskadin adierazitakoaren arabera, egun gutxitan gauzatu daiteke fiskalitatearen inguruan PSE-EE eta EAJ aztertzen ari diren ituna. Zerga sistema berraztertzea eta presio fiskala handitzea da helburua.
Erkorekaren hitzetan, "zerga sistema berraztertu eta hainbat atal ukituko dira. Presio fiskala handitzeko joera izango du oro har". Izan ere, "gaur egun euskal zerga sistema da baxuena inguruan indarrean dauden sistemekin alderatuta, batez ere Espainiako Estatukoarekin alderatuta".
Hala, enpresek ordaintzen dituzten zergak aztertzen ari dira bi alderdiak, baita gutxiago ordaintzeko gaur egun enpresei eskaintzen zaizkien kenkari eta hobari sistema. Azken finean, diru bilketa handitu beharra ikusten dute EAJ eta PSE-EEk, eta itun fiskalarekin gutxieneko diru bilketa bermatu nahi dute.
Gipuzkoan dagoeneko berraztertu dute sistema fiskala eta enpresa handiek gehiago ordaindu dezaten, enpresei kenkariak eta hobariak mugatzeko sistema landu du Diputazioak. Ondasun handien zerga ere onartu zuten Gipuzkoako Batzar Nagusiek, EH Bildu eta PSE-EEk bultzatuta. PSE-EE eta EAJren arteko itun berriak Gipuzkoako zerga sisteman adostutakoa baldintzatu lezake.
Atera berri dituzte zerga bilketaren datuak Araba, Bizkaia eta Gipuzkoako foru ogasunek, eta ikusi dugu inoiz baino diru gehiago jaso dutela. Berehala iragarri dute erreforma fiskalari buruzko gogoetarako beharrezko tartea hartuko dutela, ez dagoelako presarik, ezta premia... [+]
"Irabazi-asmoa" dutela iritzita, "Ogasunean izena ematera" beharko dituztela iragarri du Eider Mendoza Gipuzkoako Ahaldun Nagusiak.