Hauteskundeetako emaitzek erakusten dute eskuinaren indarra Polonian. %51ko parte hartzearekin, PiSek eta gobernuan egon den POk –Donald Tusk Europako Kontseiluko presidentearen alderdia– botoen %61a lortu dute. Beste hiru alderdi egongo dira parlamentuan, baina ez da ezkerreko alderdirik egongo. Ezkerreko koalizioak ez du lortu botoen %8ko langa gainditzea.

Emaitzen arabera, Legea eta Justizia alderdiak 242 eserleku eskuratu ditu. Polonian alderdi batek lortu duen emaitzarik onena da 1989an komunismoa alboratu zutenetik. Jaroslaw Kaczynski alderdiko buruak garaipena Smolensken hildakoei eskaini die. 2010eko apirilean gertatutako hegazkin istripuan zendu ziren Jaroslawen anai bikia Lech, Poloniako presidente zena eta Poloniako zenbait goi kargudun.

Zortzi urteren ostean Kaczynski bikiek sortutako alderdia boterera itzuliko da. Lehen ministro eta presidente izan ziren 2005etik 2007 arte. Hala ere, Jaroslaw Kaczynski ez da lehen ministro izango, bere ordez Beata Szydlo izango da gobernu berriaren buru. Kaczynski bigarren maila batean geratu da, zail zuelako bera hautagai izanik alderdiak hauteskundeak irabaztea. Poloniako hedabideak ordea, ez dira ziur Szydlok programa propio bat jarriko duen martxan, ala Kaczynskiren txotxongilo bihurtuko den. Emaitzen berri izan ostean, Kaczynskik hitz egin zuen eta ez Szydlok.

Errefuxiatuak hartzearen aurka eta Poloniaren handitasuna berreskuratzea

Legea eta Justizia alderdiaren aurreko gobernuak tira birak izan zituen Europar Batasunarekin, eta oraingoan ere bien arteko eztabaidagai bihurtuko dira errefuxiatuak eta karbono dioxidoaren isurketak besteak beste. Errefuxiatuen aferan, Kaczynskiren alderdiak Poloniako gobernuaren jarrera kritikatu du 7.000 errefuxiatu hartzearren. PiS alderdiak hizkera oso gogorra erabili du errefuxiatuen aurka, eta babes zabala lortu du poloniarren artean.

Edonola ere, Legea eta Justizia alderdiaren diskurtsoaren ardatza Poloniak azken hamar urteetan izandako gorakada ekonomikoaren aberastasunen banaketa txarra izan da. Sistema kapitalista alde batera utzi gabe, gobernuaren esku hartze handiago aldarrikatu dute. Polonia inperialaren “handitasuna” berreskuratzea du helburu Kaczynskiren alderdiak, Viktor Orban Hungariako lehen ministroak hartutako bideari jarraituz, kristautasunaren balioen eta tradizioaren bitartez. Adituen ustez, gutxiengoen eta emakumeen eskubideak atzera egingo dute gobernu berriarekin.