Pobrezia “normalizatu” ez dadin mobilizatzera deitu du Gunek
Ostiralean Bilbon eta azaroaren 7an Gasteizen egingo dira elkarretaratzeak, pobreziaren eta prekarietatearen aurka.
ELA eta LAB sindikatuak biltzen dituen Gune plataformak antolatu ditu bi mobilizazioak, Bilboko Eusko Jaurlaritzaren egoitzaren aurrean bata eta Gasteizko Legebiltzarraren aurrean bestea.
Ainhoa Etxaide LABeko idazkari nagusiak Eusko Jaurlaritzaren jarrera salatu du, diru-sarrerak areagotu egin direla esan arren, diru hori ez duelako gizarte laguntzetara bideratzen. “Zorra eta defizita ordaintzeko erabiltzen dira sarrerak, hau da, diru publikoa esku pribatuei ematen zaie”.
Urriaren 17a Pobreziaren Nazioarteko eguna izaki, gaiaz luze hitz egingo dela esan du Etxaidek, baina inork ez duela “benetako neurririk” proposatuko; “aberastasuna eta lana banatzea, babes soziala handitzea edo gutxieneko soldata hobetzea, dira neurri horietako batzuk, eta posible dira”.
Xenofobiaren eta populismoaren aurka
“Jokabide xenofobo eta populisten kontra agertu behar gara”. Adolfo Muñoz ELAko idazkari nagusiak horrela kritikatu du Gasteizko alkatearen jarrera, Javier Marotok (PP) sinadurak bildu nahi baititu Diru-sarrerak Bermatzeko Errenta mugatzeko.
Neurri horiek “pobreak pobreen aurka” jartzen dituztela adierazi du Muñozek, eta pobrezia “fenomeno natural” bat dela “sinestarazten” diotela gizarteari. “Pobrezia egungo politika ultraliberalen fruitua besterik ez da”.
Pobreziaren eta gizarte-bazterketaren kontrako Nafarroako sarearen arabera, Nafarroan bizi diren pertsonen %17,2 bazterketa edo pobrezia egoeran dago.
Ipar Euskal Herriko biztanleriaren %12 pobrezian bizi da. Hori dio INSEE Frantziako estatistika institutuak iragan urrian egindako ikerketa batek. Horrek erran nahi du gure lurraldeko 35.000 herritar 1.102 euro azpiko hilabete sariarekin bizi direla.
Diru-Sarrerak Bermatzeko Errentaren legea martxoan onartu zuen Eusko Jaurlaritzak, eta bertan aurreikusitako neurrietako bat jarri dute orain martxan: 19 ikuskatzailek osatutako Kontrol Unitatea, Lanbideren baitan. Iruzurrik apenas dagoen prestazioaren bueltan pobreak... [+]
Nafarroako Gobernuak pobreziari eta desberdinketa sozialari buruzko zazpigarren txostena kaleratu berri du. Datuak adierazgarriak dira: Erriberako herriek pobrezia arrisku handiagoa dute, %40 iparraldeko herriek %10. 2021ean urtean 12.000 euro jasotzen zituzten herritarrak... [+]