Abenduaren 21eko hauteskundeen emaitzak kudeatzeko arazoak etengabeak dira independentismoarentzat. Datorren asteazkenean, urtarrilak 17, Kataluniako Parlamentua osatzeko saioa egingo dute, Mariano Rajoyk hala erabaki baitzuen. Parlamentuko mahaiaren osaketa izango dute aurreneko lana.

Aurreko asteazkenean, parlamentuaren osaketa baina astebete lehenago, JxCatek eta ERCk akordioa erdietsi zutela jakinarazi zuten Bruselatik. Carles Puigdemont presidente izendatzea adostu zuten baita parlamentuko mahaiaren osaketaren nondik norakoak ere.

Carme Forcadell nahi zuen ERCk parlamentuko presidente, hala ere, berak uko egin dio kargu hori hartzeari, Forcadellen esanetan abagune politikoak ekinbide judizialik ez duen parlamentuko presidente bat exijitzen baitu. CUPek asteburuko Kontseilu Politikoan erabakiko du mahaian sartuko den ala ez. Zenbait hedabidek ERCko Ernest Maragall jo dute hurrengo parlamentuko presidentetzat, nahiz eta baieztapen ofizialik ez dagoen oraindik.

Mahaia osatuta, Kataluniako Gobernuko presidentea hautatzea du erronka independentismoak. Aurreko asteazkenean izenpetutako akordioaren arabera, Carles Puigdemont Kataluniako presidente legitimoa berretsiko dute karguan. Hori ordea parlamentuko araudiaren irakurketaren menpe dago. Puigdemont presidente izendatzekotan telematikoki edo izendatze “delegatu” bidez egin beharko litzateke.

Espainiako Gobernuak jada iragarri du hori ez duela onartuko, nahiz eta parlamentuko araudiak ez duen debekatzen. Araudi horren interpretazioaren gaineko erabakia beraz Espainiako Auzitegi Konstituzionalaren esku geratuko da. Eta ondoren zer? Korapilo hori nola askatu pentsatzen ari dira eragile independentistak, gaur gaurkoz ordea ez dago ezer argi.

CUPek ostiral goizean egin dituen adierazpenetan “arduragabe” jokatzea egotzi dio Puigdemonti. Oraindik izenen inguruan eztabaidan aritzea “erridikulua” dela uste du alderdi antikapitalistak. “Izenez beharrean, errepublika nola egikaritu eztabaidatu beharko genuke”, adierazi du Maria Sirvent diputatuak.