Txostenaren arabera, tratu txarrak umeak preso hartzen dituzten momentutik hasten dira. Armadun militarrek gau erdian esnatzen dituzte eta galdeketa gunera “lotuta, begiak estalita, lo faltarekin eta muturreko ikara egoeran” eramaten dituzte.

Behin atxilotuta, ume askok gehiegikeria fisikoak eta hitzezkoak jasaten ditzuzte, eta janaria, ura eta sendagaiak lortzeko arazoak izaten dituzte, Unicef-ek dioenez. Horretaz gain, familia eta abokatuekin harremanetan jartzeko oztopoak jartzen dizkietela jasotzen du txostenak. Batzuek ez dute inongo lege aholkularitzarik izaten.

Adingabeei israeldar militarrei edo kolonoei harriak botatzea atxikitzen diete normalean. Gehienetan, txostenaren arabera, behartuta aitortzen dituzte delituak. Izan ere, galdeketetan “heriotzarekin, biolentzia fisikoarekin eta bortxaketekin” mehatxatzen dituztela salatu du Unicef-ek.

Normalean, umeek aurrean jartzen dieten hebreeraz idatzitako dokumentua sinatzen dute, nahiz eta gehienek hitz bat ere ez jakin.

Umeak atxilotzean auzitegi militar baten aurrean erantzun beharra Israelen bakarrik gertatzen da, umeen babeserako Unicef-eko aholkulari Jean-Nicholas Beuzen arabera. Beste herrialde batzuetan salbuespen moduan aplikatzen da neurri hori, baina ez sistematikoki.

Israelek adierazi du ondorioak aztertuko dituela, eta Unicef-ekin batera lan egiteko prest dagoela.

Erakundeak aurkeztutako txostena 2009tik aurrera emandako 400 kasu baino gehiagotan oinarrituta dago. Besteak beste, lege agiriak, gobernuko eta gobernuz kanpoko erakundeek ematen dituzten estatistikak, eta NBEk eta GKEek emandako datuak baliatu dituzte.