Datozen lau urteetarako aurrekontuak aurkeztu zituen François Bayrou Frantziako lehen ministroak uztailean, eta zeresana eman zuten: zor publikoa murrizteko asmoz, datozen lau urteetan 43.800 milioi euro murriztu nahi ditu herrialdeko aurrekontuak. Hori gauzatzeko, Frantziako lehen ministroak aurkeztutako planak barne hartuko luke, besteak beste, pentsioak izoztea, lan publikoak eta osasuneko gastua murriztea, baita bi jai egun nazional kentzea ere. Horren aurrean, Marine Le Pen buru duen RN Batasun Nazionala eskuin muturreko alderdiak iragarri zuen zentsura mozio bat aurkeztuko zuela.

Horrez gain, Bayrouk iragarritako neurrien aurka, irailaren 10erako zenbait sindikatuk eta alderdik protestak deitu dituzte. Oposizioari eta kaleko deialdiei aurrea hartuz, ordea, Frantziako lehen ministroak astelehenean jakinarazi du irailaren 8an konfiantza mozio bati aurre egingo diola: "Gehiengoa lortzen badugu, gobernua berretsiko dute; bestela, erori egingo da". Frantziako Asanblea Nazionala osatzen duten alderdiek hurrengo orduetan adierazitakoaren arabera, ordea, ez dirudi Bayrouk babes handirik jasoko duenik: izan ere, LFI Frantzia Intsumisoak, Frantziako Alderdi Komunistak, ekologistek, Alderdi Sozialistak eta RNk adierazi dute aurka bozkatuko dutela.

Bost alderdi horiek Asanblea Nazionaleko 577 eserlekuetatik 315 dituzte, lehen ministroak mozioa gainditzea oztopatuko lukeena: nahikoa du aldeko boto gehiago jasotzea aurkakoak baino. Haren konfiantza mozioak izan dituen erreakzioez jakitun, astelehen arratsaldean eginiko prentsaurreko batean Bayoruk jakinarazi du aurrekontuen planeko neurriak eztabaidatu egin daitezkeela: "Neurriak ez dira inoiz inposatzen. Proposatu egiten dira, eta horien inguruan eztabaidatu". Horregatik, datozen egunetan sindikatuekin, patronalekin eta Asanblea Nazionalean diputatuek dituzten alderdiekin bilduko da, "bestelako proposamenak" entzuteko.