Azken egunetan koalizio independentistako hautes zerrendako 44 kideren inguruan polemika piztu dute Covitek eta zenbait hedabidek, eta kanpainako gai nagusietakoa bihurtu dute. “Interes partidistak” salatu dituzte zazpi hautagaiek, astearte goizean argitaratutako gutunean. Auzitegi Nazionalak kondenatutakoak dira, odol delituak tarteko, eta zazpiek jakinarazi dute hautagaitza baztertuko dutela, elkarbizitzan eta bakean laguntzeko. EH Bilduk txalotu egin du erabakia prentsaurrekoan.
Espainiako Auzitegi Nazionalak odol delituak leporatuta zigortutako ETAko zazpi kide ohik EH Bilduko zerrendetatik ateratzeko hautua egin dute, eta ez dira zinegotzi izango datozen maiatzaren 28ko hauteskundeetan. Hala jakinarazi dute Naiz-i igorritako Gure konpromisoa izeneko gutunean, astearte goizean: “Gure hautagaitzak baztertuko ditugu, ahal den neurrian, eta ziurtatuko dugu inola ere ez dugula zinegotzi kargurik hartuko”. Sinatzaileak ondorengoak dira: Jose Antonio Torre Altonaga, Asier Uribarri Benito, Lander Maruri Basagoiti, Begoña Uzkudun Etxenagusia, Jose Ramón Rojo González, Juan Carlos Arriaga Martínez eta Agustín Muiños Díaz.
Ezker koalizioko hautagaien erantzuna azken egunetako polemikaren harira etorri da. Covite Terrorismoaren Biktimen Kolektiboak salatu zuen EH Bilduko zerrendetan zeuden 44 hautagai iraganean kondenatuak izan zirela ETAko kide izatea egotzita, eta erreakzio andana eragin zuen salaketak. Espainiako eskuina EH Bildu legez kanpo uzteko eskatzera ere iritsi da.
“44 hautagai aipatu dituzte eta gehienak zigortu zituzten ‘dena ETA da’ estrategiaren baitan. Soilik politikoak ziren ekintzak jazarri zituzten, eta herritar askori eskubide zibil eta politikoak urratu zizkieten”. Salatu dute gutxiengo printzipio demokratikoen aurkakoa izango litzatekeela orain eskubide horiek zapaltzen jarraitzea.
Dena dela, asteartean pauso bat atzera eman duten zazpi hautagaien kasua desberdina dela zehaztu dute Naizeko idatzian; “kondenatu gintuzten arrazoiak direla eta”, alegia, odol delituak egotzita zigortu zituelako Auzitegi Nazionalak: “Ez dugu gure iraganeko militantzia ukatuko orain, ezta horrekin batera onartzen dugun ardura ere”. Zerrendetatik erretiratzea erabaki dute, bakearen eta elkarbizitzaren eraikutzan laguntzeko: “Gure herrietako zerrenden osaera garrantzi handiko kontua bilakatu da, eta horrek, arrazoi ezberdinengatik, gure hautagaitzak erretiratzera behartzen gaitu”.
Berretsi dute Urriaren Hemezortziko Adierazpenarekin bat egiten dutela eta ezker abertzalearen estrategia aldaketan hasieratik parte hartu dutela: “Onartzen dugu bide soilik politiko eta demokratikoaren alde egiteko hautu argia”. ETAko biktimei zuzendu zatzaizkie gutunean, erabaki honekin jasan dutena baino gehiago ez jasateko konpromisoa hartzen dutela esanez.
Agerraldia egin du Arnaldo Otegi EH Bilduko koordinatzaile nagusiak 12:00etan, Mahai Politikoko kideek lagunduta, Donostiako egoitzan, eta txalotu egin du erabakia: "Elkarbizitzarako konpromisoaren zentzuan, zalantzarik gabeko keinua da".