Amerikako Estatu Batuek NBEren baimenik gabe Siria erasotzea erabakiko balute, "gerra krimena litzateke", Kongresuak oniritzia eman ala ez, Noam Chomsky filosofo eta ekintzaile estatubatuarrak dioenez.
"Nazioarteko babesa ahuldu eta Gobernuaren argumentuek sinesgarritasuna galdu dutenean, gainerako guztiak huts egiten duenean gerra krimenetarako erabili ohi den argudioa baliatu du administrazioak: bere burua munduko poliziatzat jo duen herrialdearen mehatxuen sinesgarritasuna", esan du filosofoak The Huffington Post egunkariari eskainitako elkarrizketan. "Lehendabizi negoziatu egin beharko litzatekeela uste dut, eta horrek huts eginez gero bigarren aukerara pasa –errebeldeak laguntzea–, betiere NBEren baimenarekin. Gerra krimen oso larria litzateke bestela".
Senatuak erasotzeko baimena eman du
AEBetako Senatuak baimena eman dio Barack Obama presidenteari Bashar Al-Assaden Gobernuari erasotzeko. Baldintza bezala jarri du erasoak gehienera ere 60 egun irautea. Beste 30 egunez luzatu ahal izateko Kongresuaren oniritzia beharko luke.
The Washington Post egunkariak jakinarazi duenez, Senatuak prestatutako zirriborroak debekatu egiten du AEBetako soldaduak siriar lurretan zabaltzea, larrialdi egoeretan erreskate misioak burutzeko izan ezik. Erasoa itsasoz egingo litzateke batez ere.
Senatuak zirriborroa behin-betiko onartzeko tramiteen ostean, Kongresuak izango du balizko erasoaren inguruko azken hitza. Obama hasia da Kongresuko kideekin bilerak egiten, erasoa abiatzeko ahalik eta babes handiena lortu asmoz.