Nelson Mandelari "joaten uzteko" garaia
Nelson Mandela ospitalean dago beste behin, biriketako infekzioa dela eta. Azken urtean hainbat aldiz ospitalizatu badute ere, 94 urteko liderraren gertukoen erreakzioek oso egoera larrian dagoela iradokitzen dute.
Familiak ez du Mandelaren egoeraren berri eman, ez eta artatu duten ospitalea zein den adierazi ere, baina Argentinan Hegoafrikako enbaxadore den alaba jatorrizko herrialdera itzuli berri da. Mandibaren “osasun egoera larria” ulertu eta aurreikuspen okerrenak betetzen badira “joaten uzteko” eskatu dio presidente ohiaren burkide eta lagun izandako Andrew Mlangenek Mandela familiari.
Jackson Mthembum Hegoafrikako gobernuaren bozeramaileak “okerrenerako prest” daudela adierazi du eta herritarrei Mandelaren osasunaren alde errezatzeko eskatu. Ehunka lagun bildu dira Johannesburgoko Sowetoko Regina Mundi elizan, bozeramailearen eskaerari erantzunez.
Nelson Mandela Hegoafrikako presidente ohia da, hauteskunde demokratikoen bitartez hautatutako lehenengoa eta Afican National Congresseko buru izandakoa. 27 urte egin zituen kartzelan, Fronte Nazionaleko erregimen ultra eskuindarrak sabotajeak eta beste delitu batzuk egin izana leporatuta. 1990ean askatu zutenetik, Mandelak elkarrizketa eta adiskidetzea bultzatzeaz gain, arraza ugariko Hegoafrika demokratiko baterako bidearen zati handi bat zuzendu izan du.
Lurmutur Hiria (Hegoafrika), 1990eko otsailaren 11. Nelson Mandela aske utzi zuten, 27 urtez giltzapean egon ondoren.
Gaur, abenduak 5, munduko agintariak Nelson Rolihlahla Mandelaren izaera goraipatzen ari dira, heriotzaren laugarren urteurrenarekin bat. Hegoafrikako Apartheidaren aurkako borrokan “terrorista” izandakoa, bakearen aldeko ikur dugu egun, baita gerra eta biolentzia... [+]
Abenduaren 5ean bi urte bete dira Nelson Rolihlahla Mandela hil zela. Hego Afrikako apartheidaren aurkako borrokaren –baita armatua ere– aurpegi ezagunena da Madiba. Robben Uharteko kartzelan 27 urte gatibu izan zuten “terrorista” bakearen aldeko... [+]
