Irungo hainbat emakume elkartek eta Udalak egin dute Nagore Laffage gogora ekartzeko deialdia. Larunbatean burutuko da, 10:00etan, eta ekitaldian Laffage oroitzen duen pankarta bat zintzilikatuko dute udaletxeko balkoitik.

Urtemugarekin batera, kasuaren gainean egindako ‘Nagore’ film dokumentalaren eskubideak aske utzi ditu Helena Taberna zuzendariak. Indarkeria matxistaren inguruko kontzientziazioa sortzeko helburuz, edozein elkarteri eman nahi dio dokumentala proiektatzeko aukera.

2008ko Sanferminetan hil zuen Laffage irundarra Diego Yllanesek. Akusazioak hilketatzat jotzea eskatu bazuen ere, Yllanes epaitu zuen zinpekoen epaimahaiak homizidioa izan zela ebatzi zuen. Epaiak hamabi urteko espetxe zigorra ezarri zion arren, baldintzapeko askatasunean da martxoaz geroztik. Psikologo titulua duen Yllanesek debekatua du 2020ra arte Osasungintza Publikoan lan egitea, baina 2017ko uztailean hirugarren gradua lortu zuenetik Madrileko klinika pribatu batean da lanean.