Aurkeztutako egitarauan 55 ekitaldietatik sei bakarrik dira euskaraz: haurrentzat ipuin-kontalaria, hiru liburu aurkezpen eta bi hitzaldi.
Nafarroako Liburutegien Sarea Nafarroako Gobernuko Kultura Kontseilaritzako zuzendaritzaren menpeko egitura da eta asteon aurkeztu du urte bukaera arteko egitarau oparoa. Euskalerria Irratiak eskainitako albistean azpimarratzen denez, horietatik %10 bakarrik dira euskaraz.
Irailaren 19tik abenduaren 14ra garatuko da egitaraua. Irailean euskarazko hiru libururen aurkezpena egingo da: Maite Lopez las Herasek eta Uxue Alberdik hilaren 25ean aurkeztuko dute Ibilbidea liburua; 27an, Bakarne Atxukarrok, Izaskun Zubialdek eta Aranzadi elkarteko kide batek Irulegiko eskua izeneko aurkezpena egingo dute.
Urriaren 2an Aranzadiko Mattin Aiestaranek ondoko hitzaldia eskainiko du Nafarroako Liburutegian, eta Ateneoarekin elkarlanean: Bidaia arkeologiko bat Burdin Aroko baskoien lurraldera. Urriaren 11n, aldiz, 'Behin munduan, ipuinak liburutegian' izeneko kontakizunen txanda izango da. Azaroaren 8an eta 13an, halaber, aipatu azken ipuin kontaketa egingo da.