Asteazkenean, Iruñeko Alde Zaharreko Mañuetako udal pilotalekuan, Sabicas gitarra-jotzaile ospetsuaren jaiotetxearen aurrean Flamenco On Fire jaialdiaren barruan antolatutako ekitaldia egin dute. Ekitaldi hori kirol ibilbideak aintzatesteaz gain, justizia sinbolikoko keinu bat ere izan da, ijito komunitatea Iberiar penintsulara iritsi zela 600. urte baitira aurten.

Ekitaldirako, Sabicasen irudiari lotutako Mañuetako frontoia aukeratzea ez da kasualidadea izan. Berak flamenkoa nazioartera zabaldu zuen, eta bi kulturak lotu zituen eskubideen, memoriaren eta aniztasunaren oroitzapenaren bidez, beti ere bizikidetzaren eta Nafarroako kulturaren ardatz nagusi gisa ulertuta.

Nafarroako Pilota Jokoen Kultur Elkarteak (Napike), Gaz Kaló Nafarroako Ijitoen Erakundeen Federazioak eta Iruñeko Udalak elkarlanean antolatu dute ekitaldia. Kokapen sinboliko horretan, Iruñeko Udalaren hitzetan, "funtsezkoak diren edo izan diren" Chichan, David Arbizu, Iban Garcia eta Abraham Antimasbeheres pilotariei omenaldia egin diete, Nafarroako kirol eta kultur ondarea omentzeko.

Chichan eta Arbizuren kasuan, isiltasun une batekin omendu dituzte, duela urte batzuk hil baitziren. Iban Garcia eta Abraham Antimasbeheres gazteak dira, eta partida asko dauzkate aurretik. Horrela, txapela jaso dute pilotariek; Chichanena eta Arbizurena senideek hartu dituzte, Xabier Martínezek, Napikeren izenean, eta Ricardo Hernándezek, Gaz kalóren izenean.

Omenaldia Iruñeko historian sakonki errotuta dauden bi kultur adierazpenen arteko fusio gisa diseinatu dutela azaldu du Naiz-eko kronika Ilargi Avilak: flamenkoa eta euskal pilota. Horretarako, ekitaldian Barañaingo Lagunak Pilota elkarteko kideek esku-pilota erakustaldia egin dute, eta Domingo Rubichi gitarra-jotzaile jereztarraren saioaz ere gozatu dute, kulturarteko elkarrizketaren aberastasuna irudikatzeko asmoz.