Ekoizleen eta kontsumitzaileen arteko zuzeneko harremanak sustatzeko asmoz azoka berria jarri du martxan Iruñeko Udalak, INTIA-Reyno Gourmetekin, Nafarroako Nekazal Produkzio Ekologikoaren Kontseiluarekin (NNPEK), Elikagai Artisauen Elkartearekin eta Bizilurrekin elkarlanean. Kanpoan, aire librean, Iruñeko Basotxoa parkean izanen da azoka, hileko bigarren larunbatetan, 10:00etatik 14:00etara. “Bertako ekoizleen eta artisauen 30 postutik gora egonen dira azoka honetan, eta aurten maiatzean, ekainean, abuztuan eta azaroan eginen da”, azaldu du Isabel Pueyo Alcolea NNPEKko merkaturatze bideen arduradunak. Maiatzaren 10ean egin zuten lehen azoka, arrakasta handiz.
Azokaren bultzatzaile diren erakunde eta elkarteek aukeratuko dituzte azoka bakoitzean parte hartuko duten ekoizle eta artisauak, Nafarroako hainbat tokitatik hurbilduko direnak. “Seina postu aukeratuko dituzte Elikagai Artisauen Elkarteak, INTIAk, NNPEKk eta Bizilur elkarteak. Beste seiak Iruñeko Udalak aukeratuko ditu ekoizle artisauen erregistro ofizialetik, eta azkenik, azoka bakoitzean, gehienez, kanpoko artisauen bi postu gonbidatu egonen dira”, azaldu du Pueyok.
Maiatzeko lehen azokan erosketa saskia betetzeko moduko eskaintza izan zuten: gazta, eztia, arrautzak, marmeladak, lekaleak, garagardoa, gozoak, zukuak, hestebeteak, bitxiak, angora ahuntzen mohairrezko jantziak… “Basotxoa parkea hiriko erdialdeko igarobidea da, jende asko pasatzen da bertatik, eta horrek erraztu egiten du jendea azoka postuetara hurbiltzea”, dio kontseiluko kideak. Izan ere, Takoneratik hurbil kokatzen den parkea ezaguna da iruindarren artean, baina baita kanpotik datozen bisitarien artean ere. “Herritarrengan interes handia piztu du Basotxoa azokak, pozik gaude lehenak izan duen erantzunarekin”, gehitu du.
Merkaturatze bide laburrak bultzatzen
Nafarroako ekoizle txikiek haien produktuak zuzenean saldu ahal izateko gune berria eskaintzea da egitasmoaren bultzatzaileen helburua, baita herritarren eta ekoizleen arteko zuzeneko harremanak sustatzea ere. “Gure ustez, garrantzitsua da nekazari eta artisauen eta kontsumitzaileen arteko konfiantzazko harremanak bultzatzea, baita landa eremuaren eta hiriaren arteko lotura egiten duten azoka tradizionalak sustatzea ere”. Basotxoa bezalako azoken bidez, herritarrek Nafarroako elikagaiak eta ekoizleak ezagutzeko aukera dutela adierazi du, eta horretarako erreferentzia bilakatu nahi du azoka berriak.
Elikagaien eta artisau produktuen postuez gain, hitzordu bakoitzean ekintza eta jarduera osagarriak ere proposatuko dituzte antolatzaileek, hala nola lantegiak, dastaketak, jolasak eta zuzeneko musika. “Herritarren sentsibilizazioari begirako tailer eta ekitaldiak proposatzea da asmoa”, amaitu du.