Mélanie Bourdaa, Laboratoire Micako kideak, transmediari buruz eskaini du hitzaldia. Transmedia zer den, eta batik bat, adibideak azaltzen aritu da. Fikziozko istorio bat sortu eta hori (moldaketa guztiekin) hainbat plataformetara nola egokitzen den esplikatu du. “Star Wars”-en adibidea eskaini du besteak beste. Hiru filma dira ardatza, baina horren ondoren heldu ziren 150 bideo joko, 200 argitalpen (komikiak, liburuak…) eta animazio serieak. Unibertso transmediaren nahia jarraitzaileak erakartzea da, eta horretarako hainbat plataformetan “fan”ak harrapatzeko bideak jartzen dituzte. Plataforma bakoitzean mota bateko edo besteko informazioa  bilatzeko eta aurkitzeko aukera izango dute eta istorioan murgilduko dira.

Arantza del Pozo Viomtecheko langileak euskarazko ikus-entzunezkoen edukien azpititulaketa automatikoaz hitz egin du. Eskuz azpititulatzea nekeza da eta horren adibidea erakutsi du: ordubeteko edukia azpititulatzeko hamar ordu behar izatea gerta liteke. Bada, sistema automatikoaren bidez, hamar orduko lana bost ordura murriztu daiteke. Del Pozok Savas proiektua azaldu du eta adibideen bidez erakutsi du nola euskarazko audioak euskarazko azpititulu bihurtzen diren. Teknika hobetze bidean dira, eta zeharo garatuko balute, esate baterako audioa idatzira eskuz pasatzearen lan nekeza ezabatuko luke.

Igor Garcia ikerketa enpresa bereko kideak ikuspegi orokorragoa eman du. Ikus-entzunezko teknologien bilakaerari esker, eta batik bat konbergentziari esker, erabiltzaile abanikoa nola zabaldu den azaldu du Garciak. Hala, erabiltzaile arruntak eskura ditu iraultza digitalak garatutako euskarriak. Aldaketak ondorio txarra ere izan du. Hainbat enpresa ari da asmatzen panorama berrira egokitzen eta beste batzuk berriz, garai bateko ekoizpen ereduetan geratu dira. Dena dela, Garciaren ustez, negozio ereduak nondik nora joko duen asmatzea eta zehaztea zaila da. Geroak esango du.

Nora Barroso EHUko irakasleak adiUp proiektua esplikatu du. Info7 irratiaren albistegietan audio informazio semantikoaren kudeaketa eleaniztasuna burutzen duen sistema da adiUp. Teknologia honen bidez, Info7ko audioetan bilaketak egiteko aukera dago.

Pablo Iglesias La Tuerka.net proiektuko kideak sare sozialen potentzialitateaz hitz egin du. Ideologia ekoizteaz familia, zinea, Eliza, telebista… arduratu badira historian zehar, gaur egun sare sozialak badira ideologia egiteko, garatzeko eta ekoizteko espazioa. La Tuerka telebistako tertulia saio moduan hasi zen duela urte batzuk, baina gaur egun sare sozialetan du presentzia handia. Iglesiasek berak esan duenez, sare sozialengatik ez bazen zabalkundea ez zen horrenbestekoa izango.

Carles  Solà Plataforma per la llengua elkarte katalaneko kideak gobernuz kanpoko erakundearen nondik norakoak kontatu ditu. Internet munduan motel xamar zebilen elkartearen presentzia indartzeko ahalegina egin dute azken bi-hiru urteetan.  Webgunea hiru urtean 5.000 jarraitzaile izatetik 20.000 izatera igaro da. Twitter eta facebook asko erabiltzen dituzte eta teknologia berrietan indar handiagoa hartu izanagatik gazteak erakartzea lortu dute.