Zumarragako Arcelor Mittal fabrikako langileek giza katea eta elkarretaratzea egingo dituzte asteazkenean, zuzendaritzak plantaren ekoizpena erabat eten eta hurrengo egunean. Inguruko udalek bat egin dute deialdiarekin.
Giza katea 11:00etan abiatu da Zumarragako lantegitik, eta 13:00etan amaitu da. Tartean, 12:00etatik 12:15 bitartean, Urola Garaiko alkate, zinegotzi eta udal langileek elkarretaratzeak egin dituzte udaletxeen aurrean. Arcelor Mittalen planta betiko ez ixteko eskatu dute mobilizazioetan.
Txalo zaparrada batekin amaitutzat eman dute protesta. Giza katean parte hartu izana eskertu dute langileek. @berria pic.twitter.com/yNIDgMzfg2
— Oihan Vitoria (@oihanvito) 2016(e)ko apirilak 20
— Gotzon (@GotzonAr) 2016(e)ko apirilak 20
Hain justu, zuzendaritzak asteartean eten zuen fabrikaren ekoizpena, laminazio trena geratuta. Aurrez, pasa den astean, altzairutegiko labea eten zuten. Zortzi lagun besterik ez dira geratzen fabrikan, txatarraren tratamenduan lanean. Gainerako 342 beharginei Euskal Herrian edo Asturiasen dituen lantegietara lekualdatzeko aukera emango die zuzendaritzak. Proposamena onartuz gero, Asturiasera joango lirateke gehienak, 270 bat langile.
Asteazkenean beste bilera bat egingo dute zuzendaritzak eta langileen batzordeak lantegian bertan, 15:30ean. Hori dela-eta, fabrikaren aurrean elkarretaratzea egingo dute langileek 15:00etatik aurrera. Enpresak hainbatetan adierazi du ez duela fabrika itxi eta langileak lekualdatzeko erabakia atzera botatzeko asmorik. Langileek, ordea, fabrikaren bideragarritasuna defendatzen jarraitzen dute.
Arcelor, Ibex35eko handien artean
Azken hilabeteetan zailtasunak izan dituen arren, Arcelor Mittal enpresak goranzko joerari heldu eta Ibex35eko handien artean kokatzea lortu du. Urte haseran 22. lekuan baldin bazegoen, 10. lekuraino igo da asteartean, 3.000 euroko kapital handitzeagatik eta altzairuaren eta burdin-mineralaren susperraldiagatik, Carlos Jaramillo kazetariak El Economista webgunean nabarmendu duenez.