Sindikatuen hitzetan, Greba Orokorra eraikuntzan eta industrian izan du eragin handiena, metalgintzan batez ere (%50-60koa Araban, Bizkaian eta Gipuzkoan). EAEko datuei dagokienez, jarraipena %50koa izan da Bilboko Metroan; %55ekoa Sidenorren; %100ekoa Loiuko aireportuaren aparkalekuan; %100koa Zamakonan eta Santurtziko eta Pasaiko portuetan; eta %40ekoa Correosen. Nafarroan grebaren jarraipena zabalagoa izan da. CCOO eta UGTk emandako datuen arabera, %70ekoa.

Nafarroan, Landabengo lantegia (VW) "geldirik" egon zela esan du UGT sindikatuak. Beste datu batzuk: %100eko jarraipena SAS Autosystemtechnik-en eta FCC Logistican; %95ekoa Nacesan (Tutera); %85ekoa Tecnoconforten; %70ekoa TRW Automotiven; %50ekoa Liebherren; %30ekoa Aceralia Transformadosen (Lesaka) eta Aceralia Tubos de Beran; %50ekoa Magnesitas Navarrasen eta %35ekoa Georgia Pacificen.

Greba eguna Iruñean (bideoak), Ateak Irekiren webgunean.

Mobilizazioak eta istiluak Europan

Espainiako Estatuan eta Portugalen egin zen atzo Greba Orokorra, eta gainerako estatuetan lanuzte eta manifestazioak antolatu zituzten. Espainiako sindikatuen arabera, grebak %77ko jarraipena izan zuen. Patronalaren hitzetan, ordea, %12koa. Orotara 142 lagun atxilotu zituen poliziak, eta 74 zauritu ziren, haietako asko gau partean Madrilen egindako manifestazioaren osteko liskarretan. Portugalen ere izan ziren polizia eta piketeen arteko liskarrak, Porton eta Lisboan bereziki. Istilu larriagoak gertatu ziren Italian.

Murrizketen aurkako mobilizazioak Europan (argazkiak), EiTBren webgunean.