Gazte erakundearen aurkako 2008ko azaroko sarekadan, Mikel Beunza atxilotu zuen Polizia Nazionalak Iruñean. Inkomunikatuta pasa zituen lau egunetan torturatu zutela salatu zuen; mehatxuak eta irainak jaso zituen. ETAko kide izatea leporatuko ziotela esan zioten poliziek, eta pistola bat jarri zioten mahaiaren gainean, mehatxu gisa.

Tratu txar horien ondorioz, poliziaren aurreko deklarazioa presiopean egin zuela adierazi zuen Beunzak. Horregatik, tortura salaketa ipini zuen epaitegietan.

Madrilgo 15. instrukzio epaitegiari egokitu zitzaion kasua. Epaitegi horrek, baina, auzia artxibatu, eta torturak ikertzeko zantzurik ez zela esan zuen.

Beunzaren abokatuak epaiaren aurka egin, eta helegitea aurkeztu zuen. Ondorioz, probintzia auzitegiak hartu zuen auzia. Hor ere, instrukzio epaitegiak egin bezala, tortura ikertzeari izkin egin zioten, Beunzak ez zuelako “tratu txarrak jaso izanaren itxurarik”. Hala, 2011ko irailean artxibatu zuten gaia.

Konstituzio Auzitegira jo zuen Beunzaren abokatuak. Konstituzionalak aurreko epaitegietako jarduna kritikatu du. Hala, probintzia auzitegiak Beunzaren kasua aztertzeko “behar bezalako tresnak” erabili ez  zituela erabaki du. Nabarmendu duenez, probintzia auzitegiak ez zuen mediku forensearen txostena auzira gehitu.

Torturari dagokionez, Konstituzionalak ez du esan Beunza torturatu zutela uste duen edo ez. Dena den, instrukzio epaitegiaren eta probintzia auzitegiaren auzibideak baliogabetu ditu. Finean, epaitegien okerreko jardunaren ondorioz, Beunza babes judizialik gabe geratu zela jakinarazi du Konstituzionalak.

Orain, Beunzak berriz jo dezake epaitegietara, eta tortura salaketa berriz azter dezaten eskatu.