Artur Mas Kataluniako Generalitateko presidenteak azaroaren 9ko galdeketa “datozen egunetan” deituko duela jakinarazi du Cardonan egindako ekitaldi batean. Mariano Rajoy Espainiako presidenteari “demokrata” izateko eta David Cameron lehen ministro britainiarraren eredua jarraitzeko eskatu dio, katalanei bozkatzen utziz.
“Arrazoi demokratikoa gure alde dago”, adierazi du Masek. Azaroaren 9an bozkatu ahal izateko “ausardiaz, tinkotasunez, abileziaz eta zuhurtasunez” jokatzea beharrezkoa dela nabarmendu du presidenteak.
“Ez erabili Espainiako Konstituzioa herri katalana isilarazteko”
“Kontua ez da legea ez betetzea, baizik eta hura erabiltzea bozkatu nahi duen herri baten ahotsa entzunarazteko”, esan du Masek. “Madrilek hori ulertu beharko du”, gehitu du.
Soraya Sáenz de Santamaría Espainiako gobernuko presidenteordearen adierazpenei erantzuteko ere aprobetxatu du Generalitateko presidenteak. Sáenz de Santamaríak larunbatean esan zuen Mas “Espainiako Konstituzioari esker” dela Kataluniako presidentea. Honek adierazi du Generalitateko 129. presidentea dela, eta beraz, Generalitatea Espainiako Konstituzioaren aurrekoa dela. Lege konstituzionala “Kataluniako herria isilarazteko” ez erabiltzeko eskatu dio Masek gobernu espainiarrari.
Kontsulta legea, bozken %78,5arekin onartuta
Kataluniako Parlamentuak ostiralean onartu zuen azaroaren 9ko galdeketara deitu ahal izateko legea. CiUk, ERCk, PSCk, ICVk eta CUPek alde bozkatu zuten, eta PPk eta Ciutadansek, aldiz, kontra.
Kontsulta legea Kataluniako Aldizkari Ofizialean argitaratu bezain laster helegitea aurkeztuko duela jakinarazi du Espainiako Gobernuak.
Akordioaren bidez Juntsek eta PSOEk Kataluniako gatazka historikoa bideratuko duen etapa berri bat ireki nahi dute. Horretarako, bi indarren arteko negoziazio mahai bat eratu dute eta bertako edukiak eta akordioak segitzeko bitartekaritza mekanismoa adostu ere bai.
La Directa-k salatu du Jesús Rodríguez kazetaria inputatu izana “informaziorako eskubidearen aurkako erasoa” dela. Elkartasun manifestua plazaratu dute Rodríguezi babesa helarazteko, eta dozenaka hedabide eta erakundek sinatu dute jada, ARGIAk... [+]
Espainiako Auzitegi Nazionalak “terrorismo-delitua” egotzi dio Jesús Rodríguez La Directako erredaktoreari eta beste hamaika pertsonari, tartean Carles Puigdemont presidente ohi eta Marta Rovira ERCko idazkari nagusiari, 2019ko epaiaren aurkako... [+]
Espainiako Auzitegi Nazionala 2019ko udazkeneko protestetan “terrorismo” deliturik izan ote zen ikertzen ari da. Bitartean, PSOEko eta JxCko ordezkariak Bruselan bilduta daude.
Ostegun honetan ezagutu dira bi epaiak. Batean, Espainiako Auzitegi Gorenak balekotzat eman ditu Jordi Cuixart eta Jordi Sánchezen indultuak. Bestean, Bartzelonako Auzitegiak laur urte eta erdiko kartzela zigorra jarri dio Miquel Buch Generalitateko Barne kontseilari... [+]