"Urriaren 22an Tuteran egonen gara, euskararen alde, Nafarroako euskaldunen hizkuntz eskubideen alde, nafarren hizkuntza Nafarroa osoan askatasunez bizitzeko aukerak trabatzen edo ezabatzen dituen zonifikazioaren aurka". Hordago! herri ekimenak dei egin die "ez-euskaldun" izendatu duten eremuko herritarrei, eta bereziki Erriberakoei, urriaren 22an Tuteran egingo den manifestazioan parte hartzera.
Iazko azaroan aurkeztu zuten "euskararen zonifikazioa gainditzeko" Hordago! ekimena, Nafarroan hegoalderago dagoen Cortes herrian. Herri ekimenak adierazi zuen aurrerapausoak eman nahi dituela edozein nafarrek, edonon dagoela, eta edonon bizi dela, Nafarroa osoan euskara ezagutu eta erabiltzeko duen eskubidea praktikan jartzea eragozten duten oztopo guztiak kentzeko: “Zonifikazioa bidegabea zen duela lau hamarkada, eta orain, gainera, anakronikoa da”. Foru erkidegoan hizkuntza eskubideen araberako hiru eremu banatuta izatea nafarren artean diskriminazio, desberdintasun eta desadostasun iturri dela esan zuten. Nafarroa herritarren kohesioa sustatuko duen lurra izatea nahi dute, "herritarrak hizkuntzaren arabera mailakatu gabe, eta hizkuntzen aniztasuna kontuan hartuko duena".
Larunbatean Tuteran eskainitako prentsaurrekoan eman dute manifestazioaren berri. "Gaur hemen gauden Erriberako herritarrok euskaldunak gara, edo D ereduan ditugu haurrak, edo heldutan euskara ikasten ari gara, edo ikasteko asmoa dugu, edo bertzerik gabe, euskara gure nafar izatearen partetzat hartzen dugu, eta urriaren 22an ozen aldarrikatuko dugu euskara Nafarroa osoko hizkuntza dela, Cortestik Berara, Vianatik Gardera. Ezin baita Nafarroa euskararik gabe ulertu, ez eta euskara Nafarroarik gabe ere".