Sektore anitzeko 500 eragilek Euskal Lurralde Elkargoaren proiektua gauzatzeak duen garrantzia azpimarratu eta mezua Frantziako Gobernuari helarazi diote. Asteburuan egindako bilkuran, ekainaren 1ean Baionan egingo den manifestazioan parte hartzeko deia luzatu dute.
"Sektore eta sentsibilitate guzietako" eragileek hartu dute parte asteburuan egindako bilkuran, Elkargoaren aldeko lan-taldeak azaldu duenez.
Han ziren, besteren artean, Jean-Baptiste Etcheto Garapen Kontseiluko lehendakaria, Frederique Espagnac PSko senataria, alderdi bereko Sylviane Alaux diputatua, Jean Garreta Baionako Merkatal eta Industria ganberako lehendakaria, Marie-Christine Bessonart Hautetsien Biltzarreko lehendakaria, Jean-Mixel Galant Garazi-Baigorriko Herri Elkargoaren lehendakaria, eta Martine Bisauta Batera plataformako ordezkaria.
"Gaur bildu 500 eragileek nahi amankomuna dute: Euskal Herriak kohesio soziala garatzea, eremu urbano eta baserritarrak uztartzea, ekonomia eta lana sustatzea, tokiko egin-moldeak balioestea, sorkuntza bultzatzea, antolaketa kontrolatua ukaitea eta beste lurraldeei, Europari eta Munduari irekitzea", dio eragileek Baionan aurkeztu eta Kazeta.info-k osorik jaso duen agiriak.
Agiriko pasarte gehiago:
"Kolektibitateak berrantolatuko diren garai hauetan eta herri elkargoen, metropoloen eta eskualdeen rola indartzen delarik, ekintza publikoak sekulan baino gehiago eraginkorra izan behar duelarik, 'pays' egiturak juridikoki desagertuko direlarik eta lurraldeekiko kontratazioak ahultzen ari direlarik... Euskal Herriak proposamen konkretu batekin erantzuten du, ondoko ezaugarriak dituena: eraginkortasuna eta hurbiltasuna, lurraldearen errealitateei egokitasuna, berezitasunen kontuan hartzea, krisi ekonomikoak eta Europaren bilakaerak eragin diru-traben kontuan hartzea..."
(...)
"Lurralde kolektibitateak departamendua ordezkatzen du haren eskumenak hartuz eta Eskualdearen eta Estatuaren beste eskumen batzuk mutualizatzen ditu, lurralde honen lehentasun eta beharretan ahal bezain ongi eragiteko".
(...)
"Eskumenak eskala egokian kudeatuko dituen kolektibitatea da; gizarte zibila eta ekintza publikoa uztartuko dituen kolektibitatea da, konzertazio emankorra eta eragile publiko eta pribatuen arteko proiektuak zutik ezartzen segitzeko. 'Estatutu Bereziko Lurralde Elkargoa' estatutuak (Konstituzioan sartua dena) erronka horiei guziei zentzua ematen die".
(...)
"2013ko apirilaren 27 honetan bildu diren eragile guziek Gobernuari eta Errepublikaren parlamentariei Euskal Herriaren ahotsa entzuteko galdegiten die, lurralde honen eskaera entzuteko, bere proposamenak aztertzeko eta erantzuteko".