Larunbatekoaz gain, Herrirak beste hainbat mobilizazio ere antolatu ditu. Ostegunean elkarretaratzea egingo dute Bilbon dagoen Frantziako kontsulatuaren aurrean, kexa formal bat aurkeztearekin batera. Ostiralean, berriz, kontzentrazioak egingo dituzte hiriburuetan eta zenbait herritan.

Nagore Garcia eta Beñat Zarrabeitia Herrirako bozeramaileek azpimarratu dutenez, “espetxe politika oztopo nabaria da”, eta besteak beste, Lopez Peñaren eta Angel Figueroaren heriotzak, larri gaixo dauden presoen egoera eta Parot doktrina aipatu dituzte adibide moduan.

Alderdi politikoen eta gizarte eragileen adierazpenak

Hainbat alderdi politiko eta gizarte eragileren ordezkariek adierazpenak egin dituzte, Xabier Lopez Peña presoaren heriotzaren harira.

Berrian EH Bilduko legebiltzarkide Julen Arzuagak salatu du euskal preso politikoen auzia “humanitaterik gabe” kudeatzeaz gain, diplomazia falta egon dela eta politikaren zeresana urritu nahi izan dela.

EAJko Itxaso Atutxak adierazi du “gehiegizkoa” dela Lopez Peñaren heriotza espetxe politikari egoztea. Haren ustez ezin liteke halakorik froga. Azpimarratu du auzian “arraroa” ikusten duen bakarra familiari eta abokatuari entzundakoa dela.

ELAk azaldu du Lopez Peñaren familiari senidearen ospitaleratzearen berri ez ematea “oso larria” dela. Gertatutakoa ikertzeko eta inplikatutako administrazioek kontuak emateko eskatu du.

Espainiako Barne Ministro Jorge Fernandez Diazek ohartarazi du “preso politikoen edo heriotza politikoen inguruan hitz egitea” delitua izan daitekeela. Horregatik, azken egunetan haren ustez egin diren “terrorismoaren gorapenak” fiskaltzara igorri ditu, horien artean Pernando Barrenaren eta Patxi Zabaletaren adierazpenak.

Sortuk salatu du “mehatxu” horiekin atentzioa desbideratu nahi dutela.