Leitzan beste eraso faxista bat gertatu dela salatu du Udalak, "oraingoa ezaugarri arrazista eta ikur naziekin". Gertaera berriaren aurrean, Udalak berak deituta elkarretaratzea egingo dute herriko plazan, Eraso faxistarik ez! lelopean.
Irailaren 3an, Leitzako herritar bati autoko gurpil batean labanaz ebakia egin eta kristalean Fuera de Leiza putos monos! zioen oharra jarri zioten leihoan, Erran.eus-ek jakinarazi duenez. Oharrean SS ikur nazia ere ageri da.
"Denbora gutxian hirugarren erasoa izan da", Udalak azaldu duenez. Abuztuaren 9an, Leitzako festak hastear zeudela, txosna batean Muerte a los terroristas idatzi eta pintura gorria bota zuten. Festetako azken egunean –abuztuaren 15ean–, bestalde, herritar baten kontrako mezua idatzi zuten, "berari eta bere familiari mehatxu zuzena eginez", Txosna Batzordeak salatu zuenez.
Erasoa jasan dutenei elkartasuna adierazi eta mehatxuak salatzeko, hilaren 30ean elkarretaratzea egingo dute Leitzako plazan, 19:00etan.