Bartzelonako Probintzia Auzitegiko zazpigarren sekzioak baietsi egin du Giza Eskubideen Defentsarako Irídia erakundeak 2019ko protestetan polizien erasoa jasan zuen pertsona baten izenean aurkeztutako apelazio-errekurtsoa, eta baliogabetu egin du amnistia aplikatzeagatik auzia artxibatzea erabaki zuen Instrukzioko 4 zenbakiko Epaitegiaren erabakia.

Irídiatik igorritako oharraren arabera, Auzitegiak uste du Poliziaren tratu txarrengatik irekitako auzia tratu anker edo umiliagarrien barruan egon litekeela, eta Amnistiari buruzko Legea ezin dela aplikatu ahozko epaiketa aurretik egin gabe. Horrek aukera eman behar du gertaeren izaera argitzeko eta ea Amnistia Legetik at dagoen ala ez zehazteko.

"Irídiatik defendatu dugun interpretazioa da, kasu horiek ahozko epaiketara eramanda bakarrik ebatzi ahal izango da berme guztiekin tratu iraingarrien aurrean gauden ala ez, eta, beraz, gertaera horiek amnistiatik kanpo geratzen diren", azaldu du Brian Ventura auziko abokatuak.

T.S. izeneko pertsonak 2019ko urriaren 18an jasandako lesioa dago aztergai. Foam jaurtigai batek hankan jo zion, eta beste batek haren motxilan, korrika zihoala Bartzelonako Provenza kaletik urruntzeko, Gracia pasealekuaren eta Ramblaren artean. Ikerketak ezin izan zuen tiro egin zuen agentea identifikatu, eta beraz, Poliziaren hierarkiaren arabera agenteen nagusiaren aurka egin zuen, tiro egin zuen agentearen jokabidearen arduraduna zelako.

"Oso kontuan izan behar da orain inpugnaturiko ebazpenak ondorioztatu zuena: foam-jaurtigai batek hankan jo egin izana ez zela nahikoa tortura edo tratu apalesgarritzat hartzeko, nahiz eta foam-jaurtigaiak bizkarretik jaurti", azaldu du Venturak.

Auzitegiak adierazi duenez, ezin da baztertu legeak baimentzen dituen baldintzak bete gabe tiro egin izana foam jaurtigaia. Gainera, gertakariak protesten eremutik kanpo gertatu ziren, eta horrek zalantzan jartzen du Poliziaren justifikazioa: desordena publikoen erdian gertatu zela.

Espainiako Konstituzio Auzitegiaren eta Giza Eskubideen Europako Auzitegiaren jurisprudentzia kontuan hartu du ebazpenak, eta gogorarazi du balizko tortura edo tratu apalesgarrien kasuetan estatuak ikerketa sakona eta eraginkorra egin behar duela auzia itxi aurretik. Ondorioztatu dutenez, ikerketa egokia egin ondoren – kasu honetan bezala –,kasua ahozko epaiketara eramatera behartzen du jurisprudentziak, froga guztiak behar bezalako bermeekin egin ahal izateko.

Irídiatik nabarmendu dutenez, Probintzia Auzitegitik lortu duten aldeko bigarren ebazpena da; izan ere, "instrukzio-epaileak auzia artxibatu nahi izan zuen amnistia onartu aurretik, ez baitzuen ekintza penalik bideratu nahi izan Mossos D’Esquadrako agenteen aurka, hierarkiaren arabera foam jaurtigaiak erabiltzea baimendu baitzuten". Irídiarentzat, erabaki horrekin, "auzitegiak hautsi egin du Amnistia Legearen aplikazio automatikoaz indarrean zen interpretazio nagusia, eta atea ireki du Poliziaren indarkeria kasuak lege horretan estalduratik kanpo uzteko, hasieratik Irídiak adierazi zuen bezala".

Ebazpena 2025eko urriaren 10ean jakinarazi zen, gertaeren seigarren urteurrena baino egun batzuk lehenago, eta aurrekari garrantzitsua da giza eskubideak babesteko eta polizien zigorgabetasunaren aurka borrokatzeko.