Amnistiaren norabidean, euskal preso eta iheslariak etxera manifestua aurkeztu dute Usurbilen; manifestazioa antolatu dute apirilaren 17an Bilbon, Preso Politikoen Nazioarteko Egunean.
Igande goizean aurkeztu zuten manifestua 750 preso eta iheslari politiko ohik, Espainiako eta Frantziako estatuetako kartzeletan jarraitzen duten ia 400 presori babesa helarazi nahian: “Ozen diogu beraiekin bat egiten dugula jasaten duten bortizkeria sistematikoari aurre egiteko borrokaldi eta ahalegin guztietan, baita legedi barneko baliabideak erabiltzeko erabaki eta urratsak ematean ere”.
1.000 sinatzaile baino gehiago ditu manifestuak eta bultzatzaileek bere egin dute ezker abertzaleak ekindako bidea. “Gure ekarpen militantea egin nahi dugu Zutik Euskal Herriak ireki eta borroka armatua baztertzeko ETAren behin betiko erabakiak abiatu zuen bidean”, diote.
EPPK-k talde moduan hartzen dituen erabakiak errespetatzearen garrantzia azpimarratu dute, “banan banako urrats eta gauzatze molde horiek erabaki kolektiboak izango dira, aurrekoak ziren bezalaxe”. Adierazi dute helburua ez dela egun bakarrean erdietsiko, “modu dinamiko eta antolatuan” baizik. Legezko bideak hartzeko erabakia babestuko dutela berretsi dute: “Legedia eta espetxe araudiaz baliatzeak ez du inola ere kolokan jartzen haien guztien izaera militantea, garatutako bidearen balioa eta duintasuna. Ez orain, ez lehen”.
Preso eta iheslari politiko ohiek harturiko bidea babesteko dei egin dute. “Beharrezkoa da euskal jendartearen engaiamendua indarberritzea”, azaldu dute. Dispertsioaren aurka eta euskal preso zein iheslari politikoen etxeratzearen alde azaldu diren eragile sozial eta instituzionalei elkarlanerako gonbitea luzatu diete.
Espainiako Auzitegi Nazionaleko Manuel Carcía Castellón epaileak sei pertsona epaituko ditu Ongietorrien auzian: Antton López Ruiz Kubati, Kai Saez de Egilaz, Pipe San Epifanio, Haimar Altuna, Oihana Garmendia eta Oihana San Vicente. Guztiak Sortuko kideak... [+]
Astelehenean jakinarazi du albistea Etxerat elkarteak. Otxandioko preso politikoa baldintzapeko askatasunean zegoen 2023ko martxoaz geroztik.
Kontzertuen bidez euskal preso eta iheslariak laguntzea da xedea. Aurten, Rakatapunk, Xutik eta Esne Beltza dira egitarauan.