Nola ikusten duzu Nafarroako zuen primarioen prozesua?

Oso interesgarria izaten ari da. Irabazi edo ez gure helburua betetzen ari gara, politikaz hitz egiten ari garelako eta ez, orain arte bezala, bakarrik alderdi berri baten osaketa gaiez. Gure alderdia oso plurala da eta orain arte politikatik urrun ibili den jendea erakartzeko ahalmena erakusten ari da.

Azkenean Podemos bere izenarekin aurkeztuko da Nafarroako Legebiltzarreko hauteskundeetara?

Gu Podemos izenarekin aurkeztearen aldekoak gara. Nafarroak Ahal Du hautagaitzak, aldiz, beste izen batekin aurkeztea proposatzen du Estatu mailako estrategiak ez kaltetzeko. Guk uste dugu gure helburu programatikoak eta alderdia antolatzeko berdinak direla Estatuan eta hemen eta, beraz, ez dugula Podemosen izena ezkutatu behar. Ez da taburik egon behar eta ez zaio beldurrik izan behar edozelako eztabaidari.

Nafarroako gaiak eta itunak bertan erabakiko dira ala Estatuko Podemosek erabakiko du?

Alderdiko araudi etikoaren arabera, lurralde bakoitzeko batzarrak subiranoak izango dira eta haiek erabakiko dute. Hala ere, hainbat itunek Podemoseko estrategia orokorra kaltetu badezakete, idazkari nagusiak edo estatuko zirkuluen %25ak proposatu dezakete erabakia estatu mailan hartzea. Baina kasu horietan ongi oinarritua egon behar da eta hala ez bada eskaera horiek inpugnatu daitezke.

Badirudi gobernua osatzeko lehia estua izango dela. Itunetan zuen jokaera zein litzateke?

Erabaki hori Nafarroako Herritarren Batzarrak hartuko luke, baina eztabaida hori gaurdanik plazaratu behar da eta gure proposamena da gure helburuekin bat egiten duten indarrekin aldaketa gauzatzea. UPN, PSN eta PPN behingoz alboratzearen alde gaude, haiek ekarri baikaituzte egun bizi dugun egoera tamalgarrira.

Eta Joan Josep Boschen hautagaitzak ez luke egingo berdina? Mesfidati ikusten zaituztet.

Ez du esaten zer egingo lukeen eta horrek mesfidantza sortzen du. Gure ustez orain da gai hori plazaratu eta eztabaidatzeko unea. Orain arte ez da garbi azaldu itunena eta herritarrek badute hortaz eztabaidatu eta zer pentsatzen dugun jakiteko eskubidea.

Zuek argi diozue gai sozialak direla zuen lehentasuna. Oso labur esanda, zeintzuk dira zuen oinarriak.

Eredu sozial, ekonomiko, produktibo eta energetikoaren aldaketa sakonaren aldekoak gara. Interes pribatuaren gainetik izango diren kalitatezko zerbitzu publikoen aldeko apustua egiten dugu. Besteak beste, aberastasuna banatzeko zerga politika progresiboa nahi dugu, zorraren auditoria, banka publikoa eta urgentziazko enplegu plan bat egitea.

Zuen proposamenean, Nafarroa subjektu politiko gisa definitzen duzue. Zer egiteko?

Estatuaren deszentralizazio eta demokrazian sakontzeko tresna gisa ulertzen ditugu foruak, Nafarroaren autogobernua bermatzeko tresna dira. Badira oraindik eskuratu gabeko eskumenak herri administrazioaren eremuan, alor zibilean, zerga esparruan… Herritarren ongizatea bermatzen laguntzeko tresnak dira, eta besteak beste, ez dira eskuratu UPNk helegiteak jarri dituelako halako neurri ugariren aurka.

Horrez gain, Euskadi eta Akitaniako lurraldeekin harremanak indartzearen aldekoak gara, beti ere nafarren erabakian oinarrituta. Prozesu konstituziogile berri bat ireki behar da. Estatuan autonomia estatutu guztiak bozkatu ziren, hemen ez, beraz, egungo markoa zalantzan jar liteke. Euskadiko Podemosekin ere harreman bereziak izan nahi ditugu, haiekin kultura bera partekatzen dugu eta.

Euskarak ofiziala izan beharko luke Nafarroa osoan?

Gure ustez Nafarroa osoan bermatu behar da hezkuntza euskaraz eta zerbitzu publikoak euskaraz jasotzeko eskubidea. Ez da ezer behartu behar, baina euskara Nafarroako hizkuntza da, gure hizkuntza, eta beraz, gure eskubidea ere bai. Motibazioaren bidez euskara Nafarroa osora sustatu beharko litzateke pixkanaka.

Nola bideratzen ari da bake prozesua?

ETAk armak utzi zituen eta, beraz, oso eszenatoki interesgarria ireki da Euskal Herria eta estatu osoarentzako, baina ez zaio egoera horri behar bezala erantzun. Giza eskubidearen aldekoak gara, bizikidetza defendatzen dugu, biktimen eskubideak, presoenak… Azken finean, guk memoria historikorako nahi ditugun oinarrien aldekoak gara hemen ere: egia, justizia eta erreparazioa. Duela aste batzuk presoen abokatuen aurka izandako operazioen gisakoak, adibidez, ez dira onargarriak.

Tentsioa ere nabaritzen da Boschen ez zuen zerrendaren artean. Izango du honek ondoriorik gerora?

Ezetz espero dut. Nik estimu handia dut beste hautagaitzan dagoen jende askorekiko, eta harreman pertsonaletan oinarritu izan banintz, akaso han nengoke, baina nahiago izan dut printzipio politikoetan oinarritzea eta horregatik egin dut apustu Nafarroa Aldatu Ahal Dugu-ren alde. Bada ordua UPN, PSN eta PPN instituzioetatik kanporatzeko.