Bilboko Bultza Herri Ekimenak, “beste talde batzuekin elkarlanean”, manifestazioa deitu du irailaren 17an Getxoko Neguri auzoan. “Zuen aberastasuna, gure miseria” lelopean, 18:00etan abiatuko da manifestazioa Neguriko metro geltokitik, helburu batekin: gauzatzen ari den langile klasearen baldintzen okertzea eta pobretzea salatzea. “Euskal Herri Langilea itotzen duten politika ekonomiko basati eta hiltzaileekiko gure haserrea eta gaitzespena adierazi nahi ditugu beste behin”.

Ez dute ausaz aukeratu tokia. Neguri hautatu dute mobilizatzeko, “Espainiar zein euskal oligarkiaren botere ekonomikoko guneen kontzentrazio-toki” dela iritzirik. Repsol, Arcelor Mittal, CIE Automotive, Gestamp, Iberdrola eta Irizar enpresen izenak ageri dira mobilizaziora deitzen duen kartelean, bakoitzaren irabazien zenbatekoa ondoan dutela. Argi irudikatzen du helarazi nahi duten mezua: “Enpresa handi eta multinazionalek mozkin izugarriak lortzen dituzten bitartean, marka historikoak ere gaindituz, langile klasearen baldintzak geroz eta ezegonkorragoak dira”.

Batasunera deia

Deitzaileek azpimarratu dute langile klaseari etengabe iruzur egiten zaiola, sakrifizioak egiteko eskatuz, eta sakrifizio horien bidez aberatsak gehiago aberasten direla herritarrek erosteko ahalmena galtzen duten era berean. Zentzu horretan, irakurketa egin dute: “Kapitalismoak eta goi mailako eliteek ondo dakite klase-gatazka betean gaudela eta euren agenda bururaino eramaten dute. Euskal Herri Langileak, gure partetik, argi izan behar dugu langile klasearen batasuna dela eraso horri aurre egiteko modua, Bizkaiko metalgintzako zein beste lantegi eta enpresetako kideek erakutsi duten bezala”.

Hori esanda, Euskal Herriko langileriari bat egitera dei egin diote, ulerturik batzen dituenari aldentzen dituenari baino gehiago erreparatuz gero borroka eraginkorragoa izango dela. Manifestazioa batasunera bide horretan pauso bat bezala irudikatu dute, hala adierazi baitute sare sozialetan: “Manifestazio hau Bultza bezalako talde txikien eta zenbait pertsonaren artean antolatu da, adierazi asmoz egungo zatiketak herriari konfiantza gutxiagotzen diola zapalkuntza sozial eta nazionalarekin duen hil ala biziko borrokan”.