Azken urteetan sorturiko enplegua “oso prekarioa” izan da LABen esanetan. 2015ean Hego Euskal Herrian sinatu ziren kontratuen %93,6 aldi baterakoak izan ziren eta horietatik ia erdiek hilabete baino gutxiagoko iraupena zuten. Gazteen egoera azpimarratu du sindikatuak: “Gazteen kasuan are eta larriagoa da egoera. 2015. urtean gazteek sinaturiko kontratuen %95,7 aldi baterakoak izan dira”.

Lanaldi partzialek ere badute zeresanik enpleguaren sorreran. 2008az geroztik behera egin dute lanaldi osoko enpleguek; lanaldi partzialak ari dira nagusitzen. Emakumeak dira alor horretan kaltetuenak, emakumeen %30,6ek dute lanaldi partziala.

Soldaten irakurketa ere egin du sindikatuak. Bere esanetan, %28 eta %30 bitartekoa da soldata baxua duten langileen ehunekoa. Soldata altuenen eta murritzenen arteko aldea areagotu egin dela azpimarratu du: “2010-2014 bitartean gehien irabazten dutenen soldata %2,69 handitu den bitartean, gutxien irabazten dutenena %17,73 gutxitu da”.

LABek argitu du lan prekarietatea, langile pobreak eta pobrezia ez direla “krisiaren ondorio natural”. Sindikatuak AROPEk 2014ean kaleraturiko datuak ekarri ditu gogora. Horien arabera, EAEko biztanleriaren %15,3 pobrezia edota bazterketa sozial egoeran bizi da; Nafarroan %14,5. Bestetik, gogorarazi du krisia hasi zenean baino 138.200 landun gutxiago daudela oraindik.

Proposamenak, aurre egiteko

Egoerari buelta emateko, orain arte aplikatu diren “politiken norabidea” aldatzea proposatzen du sindikatuak. Sektore publikoak enpleguaren sorreran inplikazio handiagoa izan behar duela iritzi du, “krisiari aurre egiteko aktore nagusi den heinean”. Bestetik, lanaren banaketarako neurriak hartzea eta 1.200 euroko gutxieneko soldata ezartzea gisako neurriak iradoki ditu LABek.