Euskal Herria 11 Kolore egitasmoak nahi du euskara izatea Euskal Herrian bizi direnen lotura, jatorria zeinahi dela ere. Hala azaldu zuten larunbatean Donostian egindako prentsaurrekoan. Berriak jaso duenez, bi helburu nagusi izango ditu: Euskal Herrian kultur aniztasunari buruz gogoeta eta eztabaida bultzatzea eta euskal gizartearen kultura aniztasuna sustatzea.
Xabier Mendiguren Bereziartu Euskaltzain Urgazle eta Kontseiluko idazkari orokor ohiak Donostiako San Telmo Museoan eginiko aurkezpenean esan zuen "Euskal Herriko herritar guztien eskubide betebehar eta aukerak defendatuko" dituztela, "jatorria edozein izanda ere". Samira Goddi kultur arteko bitartekaria agertu zen, Mendigurenekin batera, proiektuaren bozeramaile gisa.
Ainara Arratibelek Berrian jaso duenez “jatorri edo identitate arrazoiengatik gertatzen den edozein diskriminazio egoera arbuiatu, eta hura gainditzeko" lan egingo du Euskal Herria 11 Kolorek. Kultura aniztasuna Euskal Herrian beti egon dela esan dute: “Belaunaldietan zehar, ezin konta ahala herrik eta kulturak utzi dute beren arrastoa gure lurraldean eta gure kulturan” baina alderantziz ere izan dela jakinarazi zuten “euskal herritar askok utzi dugu gure aztarna munduan”.
Euskal Herria denak batera egiten sentitzen eta bizitzen dugula eta denok garela Euskal Herria sentimendua zabaltzeko egingo dutela lan azaldu zuten. Hainbat gizarte eragilek bat egin dute egitasmoarekin eta atxikimenduak biltzen jarraitzeko intentzioa dute. Webgunea ireki du egitasmoak eta bideo hau egin dute euren lana ezagutzera emateko.