“Konponbidearen bidea oztopatua dagoen bitartean, kartzelako egoera gero eta gordinagoa da”, EPPK-k Berria eta Garara igorritako agiriaren arabera. Erakundeak adierazi du Espainiako Estatua “eginahalak eta bi” egiten ari dela konponbidea ixteko; eta Frantziako Estatuaren lankidetza duela horretarako. Bere aldetik, gaixo dauden presoen egoera salatzeko protestak iragarri ditu Kolektiboak.
EPPK-ren agiriak aipamen berezia egiten dio gaixo dauden euskal preso politikoen auziari, eta mobilizazioak iragarri ditu: “EPPK-ko kideok otsailaren 15etik 20ra bitartean hainbat ekimen burutuko dugu gaixo larri dauden presoen askatasuna eskatzeko”. Protesta horietan, kartzela bakoitzeko batzarrak erabakiko du zer nolako ekimenak burutuko dituen aste barruan; eta, azken egunean, guztiek barau egingo dute.
Kolektiboaren aburuz, arduradun politikoek “zekenkeriaz” jardun dute egoera berriaren aurrean: “Haien legeak bihurritzen dituzte beren intereserako. Eta legeak aski ez zaizkienean, berriak asmatzen dituzte. Gatazka betikotzeko”. Horren baitan, gaixo dauden presoen egoera, zigor urteen luzapena eta akusazio berri eta kondena potoloen banaketa salatu ditu Kolektiboak.
Aktore politiko nagusiek euskal preso politikoei eginiko zenbait eskakizun “berariazko bidegabekeria” gisa ikusten ditu EPPK-k: “Damutzea eskatzen zaigu, ez garela damutuko jakinda; kideak sala ditzagun eskatzen zaigu, ez ditugula salatuko jakinda; sinesten ez duguna esatera akuilatzen gaituzte, halakorik ez dugula egingo jakinda”.
ETAk borroka armatua bertan behera uzteko erabakia hartu zuenean, ziklo politiko berrira egokitzeko beharra izan du EPPK-k. “Zailtasunak ez ditu faltan izan”, azaldu du. Kolektiboa eskertuta dago bide horretan “Euskal Herriaren askatasunaren bidean” bere alea jartzeko aukera izan duelako. Horrela jarraituko duela iragarri du, “behar denerako prest”.
EPPK eta amnistiaren aldeko antolakundea
Agiriak aipamen egiten dio iazko azken hilabeteetan EPPK eta euskal presoen amnistia eskatzen duen mugimenduaren artean izandako polemikari. Horren harira, bakoitzaren helburuak eta beroriek lortzeko jarraitu beharreko bideak zeintzuk diren hausnartzera bultzatu ditu antolakundeak. Bere aldetik, Kolektiboak ezker abertzalearen baitan kokatzen du bere burua: “Ezker abertzalearen baitan kokatzen da EPPK, gutako bakoitzak eta ezker abertzalearen ekimen eta ekinaren gaineko bere iritzia izanda ere”.
Apirilaren 17an Preso Politikoen Nazioarteko eguna dela eta, agiri bat kaleratu du kolektiboak, eta gogorarazi du urruntze eta sakabanaketa politika bukatu izana “luzaz itxarondako albistea” zela.
Uztailaren 8an eta 9an egingo da espainieratu zutenetik izango duen lehenbiziko epaiketa. Marixol Askatu ekimenak Iparragirreren askatasuna aldarrikatu du, egungo ziklo politikoan “epaiketa oro soberan” dagoela esanez.
"Aipatu sektore horrek, EPPKko kide, EH Bildu, Etxerat, Sare eta Sorturi erasotzeko baliatu nahi izan du egoera hau guztia, Patxiren egoera konpontzeko ezer ez egitea egotziz eta, areago dena, egoera orokorraren errua ere leporatuz", dio Euskal Preso Politikoen... [+]
Urkabustaizko bizilagunak gaixotasun larria du.
EPPK-k agiri berria plazaratu du Preso Politikoen Nazioarteko Egunean. Egoera “gordina” dela adierazi du, baina ez duela “atzera” eginen erran du ere.