"Klima aldaketaren ondorio suntsitzaileenei aurre hartu nahi badiegu, beharrezkoa dugu energia berriztagarri, garbi eta eraginkorrak oinarri izango dituen sistemaranzko trantsizioa egitea", idatzi du Bryanek Red Pepper agerkarian.

Zentzu horretan, beharrezkoa da lekuan lekuko komunitate, enpresa txiki eta langileek botere handiagoa izatea. Horrek eragingo luke baliabide eta azpiegiturak esku pribatuetatik demokratikoki kontrolatutako sektore publikoaren eskuetara pasatzea; eta energia sistemak deszentralizazio bidean jartzea.

Hainbat bitarteko daude horretarako; kode irekiko energia da horietako bat.

Mozilla Firefox, Android edota Linux bezalako proiektuen filosofia du oinarri: lizentzia libreen pean diseinatu, zabaldu eta garatu dezakete erabiltzaileek. Enpresa handiekiko menpekotasuna hautsi egiten da.

Kode irekiko egitasmoak

Kode irekiko energiaren alde egin duten eragileetako bi Onawi elkartea eta Riversimple konpainia dira. Lehenaren helburua da jende ororentzako eskuragarriak izango diren aerosorgailuak diseinatzea; bigarrenak kode irekian diseinatu ditu bere hidrogeno-ibilgailuak.

Bestalde, OpenEnergyMonitor gailuak jendearen energia kontsumoa neurtzen du (elektrizitatea, gasa, hezetasuna, tenperatura, karbono dioxidoa...), erabilpenaren gaineko kontrola handitu eta sistema jasangarriagoen aldeko jarrera piztu aldera.

Enpresako ordezkari Carlos Alonsok dioenez, "energiaren gaineko kontrola izatea funtsezkoa da kontsumo ohiturak aldatu ahal izateko". Kode irekiko sistemarekin, erabiltzaileek kontrola dezakete energia-datuak noiz, nola eta non erregistratzen diren.

OpenEnergyMonitor-ek Carbon Co-op enpresarekin kolaboratzen du. Energia kontsumoa aurrezteko proiektuak garatzen ditu enpresa horrek, eguzki panelak tartean, eta aipatu monitoreek sistema horiek egokitzen eta hobetzen laguntzen diote.

La Tortuga herrixkako proiektu eolikoa

Aerosorgailuak egiten dituen Onawi erakundea, energia eolikoa oinarri duen proiektua garatzen ari da Peruko La Tortuga herri txikian. Turbina eolikoak instalatzeaz gain, horiek fabrikatzeko manufaktura-industria txiki bat garatzeko dihardu lanean Onawik. Turbinak lekuko langileek fabrikatu, instalatu eta mantentzen badituzte, haien beharretara hobe egokituko dira. Komunitateari mesede egingo dio horrek, industria-sarea osatzeaz gain, energia garbiagoa erabiliko duelako.