Guardia Zibileko agenteak gaur goizean sartu dira Kataluniako Generalitatearen egoitzan, urriaren 1eko erreferendumaren ikerketa daraman epailearen agindua baliatuta. Erreferendumaren gastuen finantzaketaren arrastoen bilaka ari dira, antza, miaketan. Hedabide katalenek zabaldu dutenez, Antoni Molons Generalitateko Komunikazio zuzendaria atxilotu dute eta bere etxea miatu. Omnium Cultural elkartea miatzera ere sartu dira operazio berean.
Goizeko 08:00etan hasi da operazioa, urriaren 1eko erreferendumaren finantziazioa ikertzen ari den Bartzelonako 13. auzitegiko epailearen aginduz. Generalitatean guardia zibilak interesatu dira Komunikazio zuzendaritzako dokumentazioez. Antoni Molons zuzendaria atxilotuta zeukaten albiste hau argitaratzeko orduan eta bera aurrean zela egiten ari ziren miaketa.
Ordu beretsuan sartu da Guardia Zibila Omnium Cultural elkartearen egoitzan ere. Kataluniako hedabideek zabaldu dutenez, guardiek bertan atxiki dituzte elkarteko zazpi langile eta lehenbiziko gauza egin dutena izan da ordenagailuen eta erabiltzaileen kodeak aldatzea.